Nongpoh, Lber 26: Ki nongshong dukan na Ri Bhoi kiba ju pynbiang bam man la ba don ka election jied nongmihkhmat la ka dei ka election MDC, MLA ne election MP mynta ka sngi ki la leit syndon ban kynduh ïa u Deputy Commissioner ka Ri Bhoi ban pynpaw ïa ka jingsngewkhia halor ka jingshah pynduh ban shalan bam ha kane ka election MP katba ïa ka kam shalan bam la ai sha u bar jylla na Shillong katba ki trai district kiba la ju ai ka jingshakri baroh shi katta ki shah kyntait lut ha ka tender ba ki la dep thep sha ka ophis u Deputy Commissioner ka Ri Bhoi.
Kane ka jingleit kynduh kitei ki nongshong dukan kiba ju pynbiang bam man ba don ka election ka dei hadien ba ki la bitar ba ka tender kaba ki thep ban ioh shalan bam ha kane ka election MP ki la shah kyntait bad la ioh pynban da u bar jylla na Shillong na ka bynta ban pynbiang bam ha kane ka election MP jong u snem 2024.
Kum ki nongshong dukan kiba ju pynbiang bam ha ka election bapher bapher na Ri Bhoi, shwa ban leit kynduh ïa u Deputy Commissioner ka Ri Bhoi ki la leit ruh ban jurip ïa ka Circuit House ha kaba la ai kyrpang ïa ka jaka ïa u bar jylla ha Circuit house ba un shet un tiew bad ban pynbiang ïa ka mar bam ha kane ka election MP.
Haba kren sha ki lad pathai khubor, ki Longkmie kiba shong dukan bad kiba ju pynbiang beit ïa ka bam ha ka por election, ki la pynrem bad ther tyngeh ïa u Deputy Commissioner ka Ri Bhoi ba u la pynduh ïa ka tender ban shalan bam ha kane ka election MP bad u la ailad pynban ïa ki bar jylla kiba wan naduh Shillong na ka bynta ban pynbiang bam ha kane ka election da kaba pynbiang ruh ïa ka jaka, ban pynbiang umbam bad kumjuh ruh ka bording iletkrik katba ha ka por ba ki shalan bam ma ki pat ki la hap ban shna ne pynbiang nadong hadong.
Ki la ïathuh ruh ha ka por ba ki thep ïa ka tender na ka bynta ban ioh shong dukan ha kane ka election MP ki don tang kumba 13 ngut ki trai muluk na Ri Bhoi bad kaba sngewlyngnoh pat ka long ba la mih pynban da ka kyrteng utei u bar jylla uba la ioh lad ban shalan bam ha kane ka election MP.
Ki la ong ruh ba kum ki nongshong dukan kiba la ju leh ïa kane ka kam baroh shi katta shuwa ban phah ka tender ruh ki la pynbiang lypa naduh ka GST bad ruh ban leh ïa ki test bapher bapher na ka bynta ka koit ka khiah bad ki la btah ruh ban pynbiang ïa ka jingbam ba khluit kumba la btah lyngba ka Foot Safety kaba ki la pyndep lut ïa ki kyndon bad phewse ha kaba khatduh ioh pynban da ki bar jylla kiba ym dei satia ki trai district.
Kitei ki nongshong dukan ki la pynpaw ruh ba kim lah satia ban pdiang ïa kane ka jingleh u DC da kab ai daw da kumne kumtei da kaba kynnoh ruh halor ka dor ka mur bad kane baroh ka dei ka jingbym burom ïa ki trai district kiba la ai ka jingshkri ban pynbaing baroh shi katta ha ki election bapher bapher.
Shuh shuh, kine ki nongshong dukan ki la dawa tyngeh na u DC ba u dei ban bhah lem ïa ki nongshong dukan bam kumba ju long man ba don ka election bad ki la dawa ruh ban siew noh ïa ka bai bam ba dang sahteng jong ka election MLA ba la dep ha ryngkat ka sut bad lada kam don ka jingkhein burom ïa ki nongshong dukan kiba dei na District kim banse ban ïaid da kawei ka lynti ban ïa pyrshah jur la ka long da kano kano ka lynti.
Ha kawei ka bvynta, ki nongïalam ka RBYWO ki la pynpaw ba kin ai ka jingkyrshan kaba pura ïa kane ka jingdawa ki nongshong dukan ba ki dei ban ioh ïa ka hok ban ioh buh dukan bam kumba ju long ha ki phew snem mynshwa bad ruh ban pynduh noh ïa ka tender ba la dep ai sha u bar jylla ba na nongbah Shillong lym kumta na ka lïang ka seng ruh kam banse ban leh da kaba tyngeh.
