Shillong, Lber 26 : U Bah Process T Sawkmie, MLA barim u la pynpaw ba ka jingkob jong u President ka Voice of People Party (VPP), u bah Ardent Basaiamoit, kaba u la ong ba u la jop lypa ka dei tang ka jingphoh sniew ha ka por mynsngi.
“Ka jingkob jong u president ka VPP, u bah Ardent Basaiamoit, kaba u la ong ba u la jop lypa, ka dei tang ka jingphohsniew ha ka por mynsngi,” ong u bah PT Sawkmie haba kren sha u nongthoh khubor mynta ka sngi.
U Bah Sawkmie u la bynrap, ba ka kam ilekshon ka long kaba eh than ban ong ba la jop lypa, kumba ong u President ka VPP ha kane ka ilekshon MP kaba mynta u snem.
U ong ruh, “Lada ka long kumta kam myntoi ban don ilekshon, la shu ai jop beit ïa kiba kam ba ki la jop lypa. Kumba long mynta ka ilekshon ka dang jngai palat, tang hadien saw san sngi ki paidbah ki la kylla lut, kumba long ka ilekshon MLA ba la dep ha u 2023.
“Ngam ïohi ba ka VPP ka don ka vision document kaba biang ïa ka jylla Meghalaya baroh kawei,” ong shuh shuh u bah Sawkmie.U la ong ba ïa kane la pynshisha ha ki constituency ba ki MLA VPP ki mihkhmat.,
“Namar la shi snem, ym pat sdang bad ïohi ïa ki kam pynroi (development) ha ki constituency jongki, kumta ka jingkob ban wanrah ka jingkylla ka dei tang ka ktien pynbiej paidbah namar ki jur tang ka ktien khlem ka kam. ” pynkut u bah Sawkmie.
