Shillong, Lber 26 : U kyrtong shimet na ka Shillong Parliamentary Constituency u Prof Lakhon Kma mynta ka Sngi Ba Ar hadien ba la thep kyrteng u la ong ba ka jingshong shngaiñ jongka ri ka don ha ka jingma na ka jingpyntreikam jongka sorkar NDA ïa ka Citizenship Amendment Act (CAA).
Haba kren sha ki lad pathai khubor u Prof Kma u la ong “Nga don shibun kiei kiei pyrshah halor ka CAA hynrei ka la ïoh noh ka jingmynjur ha u snem 2019 bad ïa ki kyndon aiñ la pynmih dang mynta shwa kane ka election.Ki don ar tylli kiei kiei, kaba nyngkong ka long ba kane ka aiñ kan knieh lut ïa baroh ki hok ïoh kam ïoh jam jong ki trai ri bad kiwei kiwei ruh ki jait kam. Namar la wanrah ïa kita ki mynder ri na Afghanistan, Pakistan bad Bangladesh halor kata ka nongrim ba ki shah pynshitom ha ki paid Muslim ha kitei ki ri”.
“ Hynrei kaba kham ma ka long ba ngi la ïalehkai bad ka jingshong shngaiñ jongka Ri. Namar khlem pep ngin kut ha ka jingwan tuid ki mynder ri, ki lehnoh sha kne ka ri bad long ki riewshet kylla ban sa ai jingtip pat sha kiwei ki lehnoh da kaba leh mynleh kum kita ki Hindu, ki Khristan, ki Jain, Sikh lane Budhist” ong u Prof Kma. “ Nga sngew khuslai namar kane ka ri ka tlot palat ha ki kam ban bud dien bad syntiat kumta ha ka ri kaba kum ka jong ngi ha kaba ki nongsyntiat ki tlot bor bha phi la shah ba ki mynder ri kiba lah ban dei ki lehnoh bad wan rieh tngen sha kane ka ri bad kane ka la buh ïa ka ri ha ka jingma kaba khraw” ong biang u Prof Kma.
Haba kylli halor ka ILP ha kane ka jylla, u Prof Kma u la ong ka donkam ban da ïa thir da ïa woh bha halor kane ka mat.
“ Kane ka mat ka la dei ban jah noh lada ym dei ba ka sorkar pdeng ka ai ïa ka ILP sha ka Manipur ha u 2020 da kaba kular ruh ba wanrah ïa ngi ha ka bor ngin ai ïa phi ka ILP. Shwa katei nga thikna ym don ba pyrkhat ban ïoh ïa ka ILP hynrei mynta pat ki la ïalehkai politik da kane ka ILP.Nga tip ba ki Seng Bhalang bad ki Seng ki samla pule ki don ka hok ban dawa namar ka sorkar pdeng ka la ïalehkai politik bad ka ILP bad ngi tip shai ruh ba ïa ka ILP ym lah ban ai da ka sorkar jylla lait noh tang da ka sorkar pdeng. Nga kwah ban ong ba kane ka mat ka long kaba jwat bha bad ngim dei ban shu kynthih kyrkieh bad ong hooid ngi kwah lane ngim kwah ruh. Ngam kwah ban ai kano kano ka jingkynthoh ïa mynta namar ngi hap ban da thew da woh da bishar bniah bha khamtam ba ka jylla Meghalaya ka dei ka jylla kaba kiwei ki jylla ki hap ban ïaid lyngba kum ka Assam haba ka leit sha ki bynta ba shathie ka Assam nangta ka Tripura. Kumta kumno yn lah ban peit bad pyntreikam ïa kane ka bynta”.
U la ong namar ba ka sorkar pdeng ka la leh politik ïa ka ILP ha Manipur kumta ka la mih biang kane ka jingdawa ILP ha kane ka jylla ruh.
“ Ngan ym poi sha kaba kut, hynrei ha nga hi tharai hap ban da ïa shong pyrkhat sani bha bad baroh bad lada ka long kaba ai jingmyntoi ïa ka jylla nga ruh ngan pdiang ïa kata hynrei lada kam long kumta nga pyrshah ïa kata” ong u Prof Kma.
U la ther ruh ïa ki seng saiñ pyrthei kiba shim kabu ïa ka kyntien Jaidbynriew. ïa kane ka kyntien la kheiñ dewthala namar la shu pyndonkam bakla ïa ka barobor. Ki kynmaw Jaidbynriew tang ynda la poi ka election MDC, MLA, MP bad hadien ba ki la jop bad poi ha ka bor phin ïohi ba kim patiaw shuh ïa kata ka Jaidbynriew bad na kata ka daw kaei kaba nga pyrshang ban ong lada nga jop ne nga rem ruh ha nga hi ka jaidbynriew ka long kaba kongsan tam.
Lada phi jied ïa nga kum u MP jong phi ngan sa pyni ïa phi kaei ka jingmut jongka Jaidbynriew. Ha kaba ïadei bad ka jingshakri Blei ba laitluid, u Prof Kma u la ong kane ruh ka don ha ka jingma namar kane ka sorkar ba mynta ka noh tang sha kawei ka niam.
“ Ngam kwah ba ka ri jong ngi kan long ka Hindi, Hindu ne Hindustan kane ka dei kawei kaba ngan ïai pyrshah jur bad kumta nga kwah ba ki paidbah kin kyndit bynriew bad phah ïa nga sha Delhi. Nga kwah ban kren ïa kane hakhmat u Modi ba ym dei ban ïalehkai bad ka Riti Synshar ka ri namar lada ïalehkai bad ka Riti Synshar ka ri phin pharia ïa ka ri lyngkhot lyngkhai. Katba ka Riti Synshar ka ri ka dang long skhem ngin long kawei ka ri kum ki nongshong shnong . Ngi ieit ïa ka ri kumba ngi ieit ïa ka Riti Synhar ka ri. Hynrei ha kata ka khyllipmat ba phin ïalehkai bad ka Riti Synshar ka ri, ngam don jingartatien ba kane ka ri kan sa pra lyngkhot lyngkhai” maham u Prof Kma.
