Kylla ktem awria bad jaka dih kyiad ka NTS Complex Nongpoh, i saitmet ka jingsma ba mih na ka jingleit shabar pathar

Nongpoh, Rymphang 19: Watla ka jingwan jong ka Nongpoh Town Shopping Complex kaba la ju tip paidbah ruh kum ka MUDA Complex kala long ka jingkyrkhu kaba khraw ïaki paidbah haka them Ri-Bhoi khamtam haka thaiñ Nongpoh ban long kum kawei naki ïew hapdeng sor Nongpoh, hynrei haba rung sha katei ka building nalor ka jingbun ki dukan kiba shu khang khyrdep, katei ka jaka bad bun ki kyndong kynshrot katei ka building kala kylla pynban kum ka ktem dih kyiad dih drok, ka jaka bret ñiut bad ka jaka leit paiñkhana bala isaitmet wat tang ban peit nalor ka jingsma kaba shyrkhei kaba mih na katei ka jaka.
Kum ban shu pynpaw, kane ka Nongpoh Town Shopping Complex ka don haduh 3 mala bad ki don kumba 100 tylli ki dukan ha kawei kawei ka mala bad lada kheiñ lang baroh ki dukan (Stall) ki la don kumba 300 tylli, hynrei bun naki dukan ki shu khang khyrdep lait noh katto katne kiba plie thikna haki bynta bah rum jong katei ka complex, bad ha khrum jong katei ka building kala don ruh ka jaka pynïeng kali kaba la shu pynlong tang kum ka Dustbin ne ka jaka bret ñiut ka jaka leit paiñkhana jong ki paidbah kaba la mih ruh ka jingsma iwtung kaba shyrkhei kaba lah ban ktah wat ïaka koit ka khiah jong ki paidbah.
Halor katei ka jingjaboh bad ki jingujor ba bun naki paidbah naka liang ka HYC Ri-Bhoi District haka jingïalam jong u Samla Tony Shylla kum u Secretary bad u Samla Nicky Nongsiej Secretary ka Nongpoh Circle kila leit ban jurip ïa katei ka NTS Complex mynta ka sngi ha kaba la lap shisha ïaka jingisaitmet ban leit rung ha katei ka building khamtam haka jaka ïeng kali bad ka bynta ba shalor (Top Floor) ba la dap tang da ki bilor kyiad, ka jingbiah pathar kat shaba lap ba shem bad kylla kum ka jaka leit shabar haki kynroh bad ki paia jong katei ka building.
Naka liang ka HYC Ri-Bhoi hadien ka jingleit jurip ïa katei ka jaka kala leit ruh ban buh da ka jingthoh sha u Deputy Commissioner ka Ri-Bhoi District namar ka seng kam shym la ioh ban ïakynduh bad u DC, bad kum ka seng kala ai jingmut ïa u DC ba u dei ban shimkhia mardor ïa ka jingjakhlia katei ka jaka bad ruh ban pynbiang ïaki bor pahara ryngkat ka jingpyndait ïaki kor ringdur ne CCTV.
Haba kren sha ki lad pathai khubor naka liang u Samla Tony Shylla Secretary ka HYC Ri-Bhoi District u la ong ba kum ka seng kala ioh ka jingujor naki paidbah naka por shaka por halor ka jingjaboh bad kylla ktem awria katei ka Nongpoh Town Shopping Complex ba ym don ba peit ne khmih ïa katei ka jaka naka jingioh mon palat ki briew ban leh ïaki kam jakhlia, dei halor katei ka nongrim ba kum ka seng kala shim ïaka sienjam ban pynlong syndon ka jingjurip da la ki jong ki khmat ïaka jinglong jingman katei ka jaka ha kaba la sakhi da la ki jong ki khmat ïaka jingisaitmet ban peit khamtam haka bynta ba halor bad hakhrum jong katei ka building.
U la ong ruh ba katei ka jaka ka dei ka iew ïa die ïa thied jong ki paidbah hynrei phewse katei ka jaka kala kylla kum kawei ka ktem ïa sngewbha ka ktem ïadih kyiad bad ym lah ban tip ka dei ruh kawei naki jaka dih bad khaii drok kaba pyntieng pynsmiej ïaki briew ban leit sha katei ka jaka khamtam haka por mynmiet.
U la ïathuh haruh hadien ka jingbym ïakynduh bad u DC ka Ri-Bhoi naka liang jong u, u la shu phone lyngba ka mobile ha kaba naka liang u DC u la kular ban shimkhia ïa katei ka kam ryngkat ka jingai jingmut sha u DC ba dei ban pynbiang ki bor pahara, ki kor ringdur CCTV bad kumjuh ruh ban pynlong ka jingkhyra naka por sahaka por da ki bor pulit namar ka jingdon jong ki briew ba ju pynlong ktem awria bad jaka dih kyiad ha katei ka jaka.