Nongstoiñ, Rymphang 20: Ka shnong Mawkhumkha kaba hap hapoh Mawshynrut Civil Sub Division, ka dei kawei na ki shnong kiba la rim bha hynrei haduh mynta kam pat don surok satia. Katei ka shnong ka don shaphang sepngi na ka shnong Porsohsan harud ka surok Riangdo Athiabari.
Ki paidbah jong katei ka shnong ki dei kiba im ha ka rep ka riang bad ki mar rep ba kongsan ki long u kwai, u sying bad u kba. Watla ki paidbah ki im da ka rep kba, hynrei ka rukom rep kba jong ki ka pher namar ym don pynthor satia bad ïa u kba ki rep ha lum.
Ha kine ki bnai ba la dep u nongthoh khubor u la poi ha katei ka shnong bad la ïoh ban ïakren bad ki katto katne ki nongshong shnong, ha kaba ki la ïathuh ba ki paidbah ki mad shibun ki jingeh ha ka leit ka wan, namar ba jingbym don surok bad haba ki leit donkam sha kiwei pat ki shnong khamtam ha Riangdo, ki hap ban ïaid da ka kjat haduh ka surok bah ha Porsohsan ban ap kali.
Ki la ong ruh ba ka jingeh ba kongsan ba ki ïakynduh ka dei ha ka por ba ki pang ki shitom, namar ki jaka sumar ki long kiba jngai bad haba ki leit ap kali ha surok bah ruh ki kali ki don tang teng khat, namar kim treh ban kamai na ka daw jong ka jingsniew palat ka surok naduh Riangdo haduh Athiabari.
Kitei ki nongshong shnbong ki la ïathuh ruh ba haduh mynta ka umbam umdih ruh ym pat don. Ka bording te ki la sdang ban pyntrei tangba ym lah ban tip haduh katno snem kin ïoh ban pyndonkam.
Halor kitei ki jingeh ba ki ïakynduh, ki la kyntu ïa ki bor sorkar bad khamtam ïa u nongmihkmat ba kin shimkhia lem ban pynpoi surok ha katei ka shnong, khnang ba ki paidbah kin lait na ka jingeh ha ka leit ka wan bad ka kit ka bah.
