Ba slem than ka Result DSC mynta ka ar snem ei ei, kynduh DC ka KSU South West
Mawkyrwat, Rymphang 19: Ka Khasi Students’ Union (KSU) jong ka South West Khasi Hills District ryngkat ki Circle lyngba ka Employment & Development Cell hadien ka jingujor na kiba bun ki samla thep-kam thep-jam bad ki samla kiba ïakhun ha ki Written Tests jongki eksamin ha ki post bapher bapher ba la pynïaid da ka District Selection Committee (DSC) South West Khasi Hills District ki la leit ban ïa kynduh ïa u Deputy Commissioner, South West Khasi Hills District ban pynsngew ha u halor kane ka bynta.
Hadien ka jingleit ban ïa kynduh, u bah Rutherford Lyngdoh, President ka KSU Mawkyrwat Circle haba kren ha ki lad pathai khubor u la ong ba ka jingleit ban ïakynduh jong ki ïa u Deputy Commissioner, South West Khasi Hills District ka dei halor ar tylli ki mat ba kongsan, kawei ka dei ba ki leit ban pynkynmaw, ïa ki eksamin thepkam na bynta ki posts bapher bapher ba la pynïaid da ka District Selection Committee (DSC) jong ka South West Khasi Hills District ba la dep ban pynlong naduh u bnai Kyllalyngkot bad Rymphang jong u snem 2022.
Kawei pat u la ong ba kaba sngewsih pat ka long ba haduh mynta, na ka liang ka DSC kam pat shym la lah ban pynmih ïa ka result watla la don kumba 2 snem ei ei naduh ba la ïoh ban pynlong ia ka eksam, u la ong.
Namarkata, u bah Rutherford Lyngdoh ula ong ba ha kawei pat ka liang kane ka jinglah ban pynlong ïa kiba kum kine ki eksamin ka la ai jingkyrmen bad ai mynsiem shikatdei eh ïa ki samla thep kam hapoh jong ka thaiñ hi baroh kawei hynrei da ka jingbym lah ban pynmih ha ka por kaba biang kane ka la wanrah ïa ka jingbymhun bad ka jingkhñium na kiba bun ki liang khamtam na ki samla kiba la dep ban leit thoh ïa kane ka eksamin.
Ha kane ka jingleit ban ïa kynduh ïa u Deputy Commissioner jong ka South West Khasi Hills District la synrang lang ruh u bah Forwardman Nongrem, President ka KSU South West Khasi Hills District, ki nongïalam ba hakhmat jong ka KSU South West Khasi Hills Distrit bad ha ryngkat ki dkhot jong ka seng na ki Circle ruh.