Kyntait u Myntri ba sam da ki jingbam khutia ïa ki samla ïalehkai ha ka Meghalaya Games

Shillong, Rymphang 19 : U Myntri ka tnad ki Kam Ïalehkai ha ka jylla, Bah Shakliar Warjri ha ka sngi Nyngkong u la ong ba kam shym la don satia ka jingsam da ki jingbam khutia (junk food) sha ki samla ïalehkai ha ka Meghalaya Games 2024 kaba dang shu kut shen ha nongbah Tura.
Haba jubab halor ka jingkylli ba wanrah da u MLA ka VPP na Nongkrem Bah Ardent Miller Basaïawmoit, u Myntri u la ong ba dei tang ha ka sngi plie pyrda ïa katei ka lympung ïalehkai kaba la wan ban donlang da ka President jong ka Ri, ba la sam da ki jingbam khutia (snack) sha ki nongïalehkai.
U ong ruh ba ka jingsam da kitei ki jingbam kadei ka jingbud katkum ki kyndon. Hynrei la ong pat ba ha ka por mynstep baroh ki nongïalehki la bam kdang bad ha ka por janmiet pat la ai kloi ïa ka ja miet.
Ha kajuh ka por, u Myntri u la ong ruh ba kam shym la don satia kano kano ka jingpynshitom ïa kito kiba pynphriang ïa katei ka khubor ba don ka jingsam da ki jingbam khutia sha ki nongïalehkai.