Shillong, Rymphang 19: Ka Tnad Police Traffic ka la pynbna ïa ka jingpynbeit ïaid kali ha ka thaiñ Golflink bad Mawroh ha ka 22 bad 23 tarik u Rymphang namar ka jingpynlong ïa ka All India Police Golf Tournament kaba 27 ha Shillong Golf Course.
Kane ka jingkhang ïaid kali kan treikam naduh ka por 5 baje mynstep haduh ka 5 baje janmiet ha kine ki sngi.
U Superintendent of Police (Traffic) u K Prasad ula pyntip namar ka jingpynlong ïa ka Golf Tournament,ka la don ka jingpynbeit ïa ka rukom ïaid kali kiba wan na Lad Mawroh sha Golflink.
Ki kali kiba wan na Mawlai Bypass shaduh Lad Mawroh kiba thmu ban wan sha Polo, ynda kila poi ha Lad Mawroh Lai Dong kin hap ban ïaid noh sha FCI ban poi sha Polo bad kumta ter ter.
Hynrei yn shah ïa ki kali ba kin ïaid tang haduh ha MPPS ne ka PTS kaba rim na ka bynta ban leit buh skul.
Ki kali kiba wan na Lad Golflink kiba kwah ban leit sha Lad Mawroh, kin hap ban ïaid noh na Tiara Restaurant ban mih sha Cahandmari- Lad Mawroh bad kumta ter ter.
Kane ka jingkhang ïaid kali kan long naduh ka por 5:30 Mynstep haduh 5 baje janmiet bad yn ym shah ruh ban pynïeng ïa ki kali hajan jong ka Golf Course.
