Shillong, Rymphang 19 : U Myntri ka tnad Pule Puthi ka sorkar jylla u Rakkam Sangma ha ka sngi Nyngkong u la ong ba kam shym la don satia kano kano ka jingpyntip ba ki don haduh khyndai tylli ki skul kiba khlem ïoh pdiang ïa u khaw midday meal kaba dei ka skim bamja sngi na ka bynta ki khynnah skul.
“Kum kine kim dei satia ban jia. Tangba ngi khlem ïoh kano kano ka jingujor. La katta ruh ngin sa shimkhia ïa kane ka kam,” ong u Myntri haba jubab halor ka jingkylli ba wanrah da u MLA ka AITC na Dadenggre u Rupa M Marak ha ka Dorbar Mangtyngka ha kane ka sngi Nyngkong.
Utei u MLA ka Liang Pyrshah haba wanrah ïa katei ka mat u la ong ba u la ïoh pdiang ïa ka jingujor na ki khyndai tylli ki skul ba ki khlem ïoh pdiang ïa utei u khaw midday meal bad halor kane u la kyntu ïa u Myntri ba un tuklar lang halor kane.
Shuh shuh u la ong ba u kwah ban tip ruh ba kiei ki sienjam ba ka sorkar kan shim halor ka jingbym lah ban pyntreikam bha ïa ka skim midday meal bad ruh ban pyntikna ïa ka jingsam da ki marbam kiba bha sha ki khynnah skul.
Halor kane, u Myntri ula ong ba haduh mynta hi, u khaw ba sam sha ki skul u dei uba bha namar na ka liang ka ophis treikam u DC Supply, FCI bad ruh ki wholesaler ki la bud pyrkhing ïa ki kyndon ban sam ïa u khaw midday meal sha ki skul.
