Nongpoh, Nailar 24: Kawei ka jingjia aksiden kaba la jia mynta ka sngi, ha ka por kumba 12 baje shiteng sngi, ha surokbah National Highway-6, haki bynta ka shnong Mawdiangum, kawei ka kali Alto K10 kaba don ïa u Registration Number ML 05 M 5111 ka la kylla khongpong hapdeng surok hadien ba ka la leit ban tynrah nadien ïa kawei ka kali Hyundai i20 kaba don ïa u Registration Number ML 10 S 0110 mar pyrshah ka IITC Complex.
Katkum ki tyllong khubor, la ïathuh ba u nongñiah ka kali Hyundai i20 u dang ñiah suki, da ka jingthmu ban phai sha ka liang kamon jong ka surok, hynrei kynsan kynsan ka kali Alto K10 kala wan bad tynrah beit nadien ïa ka kali Hyundai i20.
Ha kane ka jingjia ka kali Hyundai i20 ka la hap syndon sha nala, katba ka kali Alto K10 kaba la tynrah nadien ka la kylla khongpong hapdeng surok bah bad ki nongñiah jong baroh artylli ki kali ki la mynsaw malu-mala na kane ka jingjia.
Ki pulit ka Nongpoh Traffic ki la poi mar mar sha katei ka jaka ban pynlong ïa ka jingtohkit bad ban weng noh ïa baroh artylli ki kali na ka bynta jong ka surok, khnang ban lait na kino kino ki jingthut bad jingïakynduh jingeh ha ka jingïaid jingïeng jong ki kali bad ki paidbah kiba pyndonkam ïa katei ka surokbah.
