Kylla jaka thehñiut hajan ka khyrdop MGU, mih ki samla pule, nonghikai ban pyrshah
Ki PCB jong ka Assam- Meghalaya ki dei ban shimkhia
Nongpoh, Jylliew, 29: Namar ka jingijli bad ka jingsma iwtung kaba shyrkhei kaba mih naka jingbret jaboh pathar harud surokbah ha 13 mer, Byrnihat kaba don mar pyrshah bad ka khyrdop ban rung sha skulbah Mahatma Gandhi University, ki samla pule ryngkat ki nonghikai jong ka skulbah MGU lem bad ka seng trei mon sngewbha ka Blue Sky ha ka sngi Saitjaiñ ki la pynlong ïa ka jingïakhih paidbah ha 13 mer, Byrnihat,.
Ïa ka jingïakhih la lamkhmat da u Assistant Professor ka tnad Social Work ka skulbah MGU u Dr. Amalesh Adhikary ha kaba ki samla pule ryngkat ki nonghikai ki la mih sha surok ryngkat ki plakad ban pynpaw ïa ka jingsngewkhia namar ka jingpynkylla jaka theh ñiut hajan ka khyrdopjaka ka la pynsniew dur ïa ka mei mariang nalor ka jingsma iwtung kaba mih namar ka jingbret ïa ki jaboh bym ithuh ithaw kaba ktah pat ïa ka koit ka khiah jong ki samla pule, ki nonghikai bad ïa ki nongtrei jong ka skulbah.
Ka jaka ka don ha khappud Assam-Meghalaya ka hap hapoh ka Sonapur Revenue Circle (Assam) hynrei ka don marjan bad ka Meghalaya kaba wanrah ïa ka jingkulmar bad jingbym shimkhia jong ka Sorkar.
Ki samla pule bad ki nonghikai ryngkat ka kynhun Blue Skyl ki la dawa ïa ki synshar district, ki bor shnong bad kumjuh ka Pollution Control Board na ka Jylla Meghalaya bad ka Jylla Assam ban weng ïa ka jingeh bad ki la rai ruh ban ujor sha ki bor ba dei peit namar ka jingpynkheiñ ïa ka Solid Management Rules, 2016 (ba la pynbeit thymmai ha u snem 2022).
Ki la dawa ruh ban wad bniah ïa ka tyllong nangno ki jaboh ki mih, ban ithuh ruh da ki jaka bret ñiut kiba thikna, ban buh da ki tin bret ñiut ha man ki jaka bad ki la kyntu ruh ïa ka Sorkar Meghalaya bad Assam ban pyntreikam ïa ka thong jong ka Swachh Bharat Mission bad ka Waste Management Rules jong ka Ministry of Environment and Forest jong ka Sorkar India, khnang ba ka khuid ka suba kan wan ha ki shnong ki thaw khamtam ba ki paidbah kim dei ban bret pathar ïa ki jaboh jabaiñ ha ki jaka bym dei kaba ktah pat ïa ka koit ka khiah jong ki briew nalor ka jingpynjot ïa ka mei mariang.