Kylla ïingjah ka Residential School ha Myrdon, kyntu ka HYC ïaka sorkar ban pyndep noh mardor

Nongpoh, Nailar 22: Ki nongïalam jong ka HYC Ri-bhoi District kila pynpaw ka jingsngewbynñiaw halor ka jingpynsah teng jong ka sorkar ban pyndep noh ïaka Residential School haka shnong Mawtari Myrdon ha kaba katei ka skul mynta kala kylla ïingjah bad dap da ki sañium hadien ba ka sorkar kala ieh shrah la la kumba 10 snem bad naka liang ki nongïalam ka seng kila leit ruh ban jurip dang ha kine ki khyndiat sngi.
Kumba la ioh jingtip da ki nongïalam ka seng, kum kitei ki jait skul ki don kumba 19 tylli eiei ha ka jylla baroh kawei bd tang ha Ri-Bhoi District ki don kumba 3 tylli ba kynthup haka shnong Mawtari Myrdon jong ka Umsning Block, ka Nongrim Synjari ha Umling Block bad sa kawei pat ka don ha Jirang Block, bad naka liang ka seng kan sa leit ban jurip ïa baroh kitei ki skul la ki long ne em kumba long ha Mawtari Myrdon ka jinglong jingman.
Naka liang ki nongïalam ka HYC Ri-Bhoi naduh u Bah Hercules Suting President bad u Bah shemphang Masharing Secretary kila pynpaw ba kum kitei ki jait skul kin long ka jingkyrkhu kaba khraw lada ka sorkar ka shimkhia bad leh thikna ban pyndep ïaki ban long kum ka shlem hikai ban ai ka jingshakri sha ki khynnah khamtam kiba wan naki longing baduk ba rangli, hynrei haba phai sha ka Residential School kaba don haka shnong Mawtari Myrdon mynta ka shu iehshrah la bun phew snem bad kala kylla long tang kum ka iingjah bala sap bad ker ruh da ki sañium.
Kitei ki nongïalam kila pynpaw ruh ba ïa katei ka skul la sdang ban shna naduh u snem 2012-2013 naduh ka por ka sorkar MUA 2 haka por ba u Mukul Sangma u long kum u Myntri Rangbah ka jylla hynrei ka jingbymlah ban pyndep ïa katei ka skul ka pynduh jingmyntoi ïaki khynnah pule, bad kyrpad ruh ïaka sorkar ba mynta ba kam dei ban leh politik ïa kino kino ki kam pynroi kiba long ka jingkyrkhu bad ka jingmyntoi ïaki paidbah khamtam ki jaka pule.
Hadien ka jingjurip bad lap ba katei ka Residential School kala shu kylla long tang ka iingjah naka liang ki nongïalam ka seng kin sa leit ruh ban ïakynduh syndon ïaki bor bahalor bad ki bor ba dei peit, khnang ba ka jingkhmih lynti jong ki kmie ki kpa ban ioh pynleit skul ïala ki jong ki khun kan urlong noh.
Mynnin ka sngi 19tarik kaba ki nongkitkam ka HYC Ri-bhoi District , ki la leit ban jurip ia ka building ka Residential School, kaba la sahteng mynta la kum ba 10snem ha shnong Mawtari Myrdon, Ri Bhoi, ki la pynpaw ia ka jingbynniaw halor ka jingpynsahteng ka sorkar ban pyntreikam noh ia kiba kum kitei ki skul, ha kaba ki la pynpaw ruh ba ka sorkar ka la dei ban pyntreikam noh ia kitei skul khnang ba kan long ka jing myntoi iaki paidbah.
Bad katkum ka jing ioh jingtip Jong ka seng , ba kiba kum kitei ki Building ki don kumba 19 tylli ei ei ha ka jylla baroh kawei bad tang ha Ri Bhoi District ki don haduh lai tylli, kiba kum kitei ki Building kata Mawtari Myrdon kaba hap hapoh Umsning Block, ha Nongrim Synjai kaba hap hapoh ka Umling Block bad kawei pat hapoh ka Jirang Block, bad ka seng kan sa leit jurip ruh iakitei skul ban tip bniah la ki lahdep plie ne em namar kum ba ka long ha mawtari myrdon ka jing sngew bynñiaw shibun eh na katei ka Building kiba la shna ka klem dep pura , hynrei ki la shu sahkut beit tang shiteng khlem da lah ban pyndep lut bad mynta lei ka la kylla khlaw .