Khliehriat, Nailar 22: Ki dkhot jong ka Khasi Students Union Narpuh Circle, hapoh ka jingïalam u Organising Secretarry, u samla S.Lapasam, hynnin ka sngi ki la pynlong ïa ka jingleit jurip ïa ka surok national highway kaba naduh Mynkre ter ter shaduh Malidor, ki la lap ba ka National Highway Authority of India kam shym la shim khia eiei ban maramot ïa ka surok kumba ka la dep kular ha ki paidbah ka thaiñ myn ha ka 8 tarik mynta u bnai ha ka por ba pynlong ïa ka jingiakhih paidbah ha Lumshnong.
La ong ruh ba ka jingsyrtok ki paidbah mynta lei ka la nang jur katba nang mih ki sngi namar ki mad jingeh palat ha ka leit ka wan, na ka daw ka jingsniew palat ka surok ha Narpuh.
Ka seng ka la ong ba kane ka jingleh mynthi ka NHAI, ka long kumba pynbor biang pynban ïa ki paidbah ka thaiñ ban mih madam biang ban iakhih paidbah biang da kaba kham tyngeh, nalor ba mynta ka la dep dap ar taïew ka pynlong ïa ka jingiakhi, ka seng hi kan nym shong kli kti hynrei kan bud dien bad kan ieng beit halor ka nongrim ba ka NHAI ka dei ban sngewthuh ïa ka jingeh jong ki paidbah nongleit nongwa kiba ju mad jingeh na ka daw ka jing sniew palat kane ka surok.
“Na ka liang ka seng, ka la dep pynpaw bad kren da kaba shai ba kan nym pat plie ïa ki tala ha katei ka toll gate kaba don ha Lumshnong tat haduh ba ka NHAI kan da maramot bha ïa ka surok haduh 6- haduh 70 percent ka jingmaramot”
Ha ka jingleit jurip, ki dkhot ki la lap ba ka surok ka la dap da ki thliew ki syar ba heh ba heh hapdeng surok, ba la dap sa tang da ka um ktieh bad ka jyrsieh, ka bym i dei shuh kum kata ka surok national highway, kane ka buh jingma wat ïa ka jingim briew ruh, khamtam kito kiba ñiah ïa ki kali heh ba kit jingkit bad kumjuh ruh kiba ñiah bad ba shong ha ki kali rit.
Na ka liang u President KSU Narpuh Circle, u bah K.S.Suchiang u la ong ba ki paidbah ki sah ha ka umdum bad ki sngew bitar ruh namar kane ka jingleh mynthi ka sorkar bad ka NHAI ban maramot ïa ka surok bad bynrap ruh ba ia ka toll gate hap khang beit mynta haduh ban da maramot bha ïa ka surok ha Narpuh.
U la ong ruh ba man la ka por, wat ha ki snem kiba la leit ruh, ki ju ai daw ba ka dei ka aiom slap ym lah ban maramot, hynrei haba la kut ka aiom slap slap ruh ka NHAI kam ju shim khia ban maramot ïa ka surok, mynta ka kynti na ka liang ka seng bad ki waheh shnong kin bud dien ïa kane ka jingmaramot ïa ka surok, kata ynda la kut bha kane ka aiom slap.
