Nongpoh, Nailar 22: Kumba la paw ba dang ha kine ki khyndiat sngi ka seng HITO na Ri-Bhoi District kala pynpaw ka jingpyrshah kaba jur halor ka jingpoi biang u Raja Brahma sha Ri-Bhoi District hadien ba u la shah pynkynriah kam shipor, ban shimti pat kum u ADC bad Project Director ka DRDA, hynrei utei u ophisar sorkar u la ioh pynban shibun ka jingkyrshan khamtam naki nongïalam shnong kum ka Synjuk ki Rangbah Shnong Border Area.
Bad mynta ka sngi sa kawei pat ka kynhun ka Ri-Bhoi Dorbar kala mih sahkhmat ban sngew burom halor ka jingwan poi biang utei u ophisar ban shakri sha ki paidbah ka dong Ri-Bhoi, ha kaba naka liang ki nongïalam ka Ri-Bhoi Dorbar mynta ka sngi kila pynkup burom ruh da u syntiew ha ophis treikam jong u kum ka dak ka jingpdiang burom sa shisien ïa une u ophisar u ba ju kyrshan bad ai ka jingïatreilang bad ki paidbah khamtam ban kyntiew ïaki longkmie haki Self Help Group haka por ba u long kum u BDO ka Umsning C&RD Block.
Naka liang u Bah RB Shadap uba dei u President jong ka Ri Bhoi Dorbar u la ong ba ka mat kaba hakhmat eh kaba na ka liang jong ka kynhun ki la leit ban ïakynduh ïa une u ophisar ka long halor ki kam khappud bad kumjuh ruh ka kam thungkam thungjam lyngba ka District Selection Committee kaba dei ka mat kaba ka kynhun ka la ïakren teng haka por kaba une u ophisar u dang long kum u BDO ha Umsning bad bat ruh ïaka kam Member Secretary jong ka DSC ha Ri Bhoi.
Ha katei ka jingleit ïakynduh ki nongïalam jong ka Ri-Bhoi Dorbar ki la pynpaw ba ki la buh ïaka jingkyntu hakhmat jong une u Officer ban kham pynkloi noh ka jingpynmih ïaka result jong ka DSC namar ka ktah ïaka rta jong ki nongthepkam, ki nongïalam ki la pyntip ba utei u ophisar u la kular ba yn ïaleh katba lah ban pynmih noh ha shuwa u bnai Nohprah mynta u snem ryngkat ka jingkyntu ruh ïa utei u ophisar ba ha ka kam DSC dei ban phaikhmat shuwa nyngkong ïaki trai district, kila bynrap.
