Dang don kiba ktha khlieh haduh mynta ba jop kput ka VPP haka MP

Nongpoh, Naitung 25: Ki nongïalam ka Voice of the People’s Party naduh u Bah Ardent Miller Basaiawmoit President ba rangbah, u Bah Brighstarwell Marbaniang MLA ka Mawlai bad kiwei kiwei mynta ka sngi kila hiar sha Nongpoh ban ai ka jingkhublei ba kyrpang bad ka jingsngewnguh sha ki paidbah ka thaiñ Ri-Bhoi namar ka jingpynjop don burom ïa u Dr. Ricky AJ Syngkon kum u MP ka Shillong Parliamentary Seat bad ïa katei ka jingïalang ai khublei la pynlong ha Ïew Mawlong Nongpoh.
Haba kren ha katei ka sngi naka liang u Bah Ardent Miller Basaiawmoit u ai ka jingkhublei ba kyrpang ïaki paidbah naki 5 tylli ki constituency jong ka dong Ri-Bhoi kiba la ai ka jingkyrshan ba pura ïa u kyrtong ka VPP ha kane ka elekshon MP ba dang shu dep, watla bun naki party haba sdang ïaka jingïalap elekshon, kiba bun na kiwei ki party ki kheiñ troiñ da kaba ong ba ka VPP kan nym poi shano shano ruh, hynrei ka sngi ñiew vote kala pynshaiong ngaiñ ïakita ki party hadien ba u kyrtong ka VPP u la tam kput haduh 3 lakh tam ka vote bad dang don kiba ktha khlieh bad shaiong haduh mynta halor ka jingjop kput ka VPP.
“Kane kadei ka bor jong u paidbah bad ym don ba lah ban pyntieng lane ban pynbiej daka pisa ïa u paidbah bad ka jingjop ka VPP ha kane ka elekshon MP ba dang shu dep ka dei ka jingjop jong u paidbah” la ong u Bah Ardent da kaba bynrap ruh baka jingïoh ïaki vote ha baroh 5 tylli ki constituency ha Ri-Bhoi ka long ka jingkyrmen ïaka party kumba ka don ka jingthmu ban wanrah ka jingkylla, namar wat haka Jirang Constituency kaba dei ka constituency kaba khleh bun ki jaitbynriew ka party VPP kala ioh da ki hajar vote bad kane ka pyni ba u paidbah um dei shuh u ba biej, hynrei ki tip bad nang ban jied ïaki nongïalam.
U Bah Ardent u la ong ruh ba ka party VPP ka dei ka party kaba don ka jingkhlieh naka bynta u paidbah bad ka jingthmu ba hakhmat hi jong ka party ka long ban wanrah ka jingsynshar kaba khuid ba suba bad ngi la iohi shai ruh ba ki paidbah ha kane ka sorkar ba mynta kila ngiah ïaka jingshukor jong ki nongïalam bad kum ki paidbah kila thrang shisha ban wan ka jingkylla.
U la ong ruh ba kila don ki langiong kiba thmu ban ïalam bakla bad pynduh jingkyrmen ïa u paidbah da kaba ong ba u MP ka VOO un leit leh aiu marwei sha iing Dorbar Parliament, hynrei ki kam ki paw shai ba u MP ka VPP um shym la leit ban shongkai hynrei ngi la iohi mar sien sdang ka dorbar u la ieng ban kren naka bynta ki ishu jong ka jaitbynriew.
Shuh shuh u Bah Ardent u la ong ba ka jingkynthoh ïaka party VPP kam kut kila pyrshang ruh ban pynsngewthuh bakla ba lada jop ka VPP kin sa pynkylla lut ka ai jait sha u kpa, naka liang u Bah Ardent u la buh jingkylli ruh mynno ngi buh ïa kane ka mat ban pynkylla ai jait kpa, ka VPP kam tuklar ïaka kam shimet la u ai jait sha u kpa ne ka kmie.
Wat hapdeng ki jingshah kawang maw ki jingshah kynthoh bad ka jingpynsngewthuh bakla sha ki paidbah, kum ki nongïalam ka VPP ki ieng skhem halor ka nongrim jong ka party ban trei bad shakri naka bynta u paidbah bad khlem pep lada ngi peit ïaka jingshanniah bad ka jingai jingkyrshan ki paidbah, ka party VPP kan sar naphang ruh ha kane ka elekshon MDC bad MLA ban sa wan, la bynrap u Bah Ardent.