Nongpoh, Naitung 23: Ha ka jingleit khynra ïa ki kot ki sla da ka seng HYC Ri Bhoi District ïa kawei ka Karkhana sain jri ba la tip kum ka Resource Rubber Private Limited, kaba don ha Mawsmai ha Ri Bhoi, ki nongïalam ka HYC ki la shah pyni bor pynban ha u bar jylla bad u la kyntait ban pyni ïa ki kot ki sla, da kaba kynnoh ba kitei ki seng bhalang kim don hok ban wan khynra kot khynra sla khlem da ioh jingbit na ki bor sorkar.
Kane ka jingïapyni bor hadpeng u trai katei ka Karkhana sain jri bad ki dkhot nongïalam ka HYC Ri Bhoi, ka dei hadien ba ki nogïalam ka HYC ki la leit ban khynra kot khynra sla ïa katei ka Karkhana sain jri, ha kaba u trai katei ka Karkhana, u Joginder Pal Kapoor, u la pynibor bad kren heh ïa ki nongïalam ka HYC da kaba u la kyntait war ban pyni ïa ki kot ki sla halor ka jingpyntreikam ïa katei ka Karkhana.
Kane ka jingleit khynra kot khynra sla ka seng HYC Ri Bhoi ïa katei ka Karkhana sain jri, ka dei ruh hadien ba ka seng ka la ioh jingujor, ba u trai katei ka Karkhana naduh u snem 2022 um shym la siew bai wai satia ïa u trai jaka bad la kynnoh ruh ba katei ka Karkhana ka pyntrneikam beaiñ khlem da don ki kot ki sla kynthup ruh naduh ka trading license.
Haba kren sha ki lad pathai khubor, u Bah Tonny Shylla, general Secretary ka HYC Ri Bhoi, u la ong ka daw kaba la pynlong ïa ka seng HYC ban leit khynra kot ha katei ka Karkhana sain jri, ka dei halor ka Nongrim ba ka seng ka la ioh jingtip ba katei ka Karkhana ka pynïaid beaiñ ïa ka karkhana khlem da don ki kot ki sla kiba biang.
U la ong ruh ba ka seng ka kam poi pyrkhat ba ha kane ka jingleit khynra utei u bar jylla un pyni bor ïa ki nongïalam ka seng bad ka jingpynibor jong u, ka la pynbitar shisha ïa ka seng ha kaba u bar jylla uba wan ban seng kam ha kane ka jaka jongngi u dang nud ban pynibor ne leh heh wat ïa ki trai muluk ki trai jaka.
“Kane ka jingpynnibor une u bar jylla ka paw ruh ba um don kot don sla, na kata ka daw haba wan khynra ka seng, ha ka jaka ba un pyni ïa ki kot ki sla bad phewse u la pyni pynban ïa kajingbitar kaba paw shai ba um don satia ïa ki kot ki sla” ong u Bah Tonny Shylla.
Shuh shuh, u la bynrap ruh da kaba ong, ha ka jingshisha ka seng kam thmu ban leh da ka bor bad ka kwah ban ïaid da ka lynti ban pan ïaki kot ki sla bad kane ka jingpyni bor utei u bar jylla ka la pynbitar ïa ka seng, ha kaba ka seng kam salia bad lada kane ka Karkhana kam lah ban pynbiang ïa ki kot ki sla ka seng kam banse ban shim da kawei ka lad ka lynti haduh u pud ba ka seng ka la khang tala syndon ïa katei ka Karkhana, kaba dei tang na ka daw ka jingpynibor utei u bar jylla, u la bynrap.
Na ka liang U Bah Donald Rymbai, kum u trai jaka, u la ïathuh ruh ba utei u bar jylla naduh u snem 2022 um shym la siew ïa ka bai jaka bad ruh um treh satia ban ïa soi soskular hapdeng ma u kum u trai jaka bad kum u trai katei ka Karkhana sain jri, kaba u pyntreikam ïa katei ka Kharkhana saiñ jri ha ka jaka jongu.
U la ong ruh ba une u bar jylla um don satia ïa ki kot ki sla bad kynthup ruh naduh ka trading license ha kaba u la shu pyïaid beain ïa katei ka Karkhana bad u long ruh u briew uba pynibor bha da kaba u la ju mlien ban thok ban shukor tang ioh pynïaid ïa katei ka karkhana.
U la ïathuh ba naka liang jong u kum u trai jaka, u la dep ruh ban ujor ïa kane ka jingleh beain utei u trai jaka sha ki bor synshar district naduh u snem ba la dep, hynrei kumba long haduh mytna kam shim don satia ka jingshim khia ban tohkit kaba dei ha ka por ba dang don u DC barim ka Ri Bhoi.
Shuh shuh, u Bah Donald Rymbai, u la bynrap ruh da kaba ong, ba ka daw kaba la pynlong ïa u, ban pan jingïarap na ka seng HYC, ka dei halor ka jingpynibor utei u bar jylla bad kum u trai jaka u don hok ban beh noh ïa utei u bar jylla, hynrei u sngewheh bad sngewmen namar ba don kita ki trai ri kiba kyrshan pynban ïa u, ha ka jaka ba kin kyrshan ïa u kum u trai ri na kane ka District, u la bynrap.
