Nongpoh, Nohprah 09: Watla ka Sokar Jylla ka la tei ïa ka Screening Centre ban ïa khun pyrshah ïa ka khlam COVID-19 ka la pynlut ban tei ïa katei ka ïing da ka pisa u paidbah, hynrei hadien ba la kut noh ka khlam Covid-19 katei ka ïing ka ka kylla long pynban ka ïingjah khlem da pyndonkam shuh da ka sorkar.
Kane ka Covid-19 Screening Centre ka dei kaba la tei da ka sorkar ha ka por ba wan lynshop ka khlam COVID-19 hapoh ka jylla, ha kaba la shna bad pynwandur bha kum kata ka jaka ban ïakhun pyrshah ïa katei ka khlam ha Byrnihat bad tang hadien ba la kut pat ka khlam la sakhi ba katei ka screening centre ba ki ïakhun puyrshah ïa ka khlam covid-19 ka la shuh kylla ïingjah noh haduh kine ki sngi.
Kumba la lap bad sakhi, katei ka Covid-19 Screening Centre kaba la tei harud ka surokbah National Highway-6 ha Ri Bhoi bad kaba hap hapoh ka Shnong Byrnihat Proper, ha ka por ba dang dep ban tei ka long ka ïing kaba khuid bad kaba la itynad bha ba la pyndonkam ka sorkar na ka bynta ban ïakhun ïa ka khlam COVID-19 bad tang hadien ba la kut pat ka khlam katei ka ïing ka la shu kylla ingjah khlem da pyndonkam shuh da ka sorkar bad ba la shu iehnoh ïingjah.
Haba leit ban jurip ha katei ka jaka, la lap ba katei ka jaka ka la jaboh bad la dap tang da ki jaboh suda hapoh katei ka ïing bad kaba isaitmet ka long ba kam don kano kano ka jingniewkor ïa ki ïingsorkar ha kaba la suba ba katei ka jaka ka lah ban kylla long kum ka ktem ki kam sniew namar ym shym la don kiba peit ba khmih ne basumar wat la ka sorkar pat ka la pynlut ïa ka pisa u paidbah ban tei ïa katei ka ïing.
Shuh shuh, halor kane ka jingbym lah shuh ban pyndonkam ïa katei ka ïing ba la dap da ki jaboh suda bad lada ym don kita kiba peit ba khmih ka lah ruh ban kylla long ka ktem ki kam sniew ha kaba bun na ki riew paidbah ki la ju kren halor katei ka ïing ba la shu iehnoh ïingjah khlem da pyndonkam pat ha kiwei ki kam kaba dei hadien ba la kut ka khlam COVID-19.
