Shillong, Risaw 29 : U Myntri ka sorkar jylla ba dei ruh u MLA ka BJP na Pynthorumkhrah, Bah AL Hek u la pynpaw ba u long u ba kloi ban aireng na ka tiket BJP ha kane ka elekshon MP ban sa long shen ha u snem ban wan.
“U Bah Hek u la dep ban pynpaw ba u long uba kloi ban aireng ha kane ka elekshon MP bad bun ki paidbah ki kham noh ka mon ïa ka kyrteng u Bah Hek,” ong uwei na ki heh BJP u bym kwah ban pynpaw kyrteng.
Shuh shuh u la ong ruh ba u Bah Hek u la pynpaw pat ba lada ka party ka kloi ban ai tiket hangta un sa shim ïa ka rai. Nalorkata, u la pynpaw ruh ba haduh mynta hi ym pat don mano mano ruh ba wan ban mih shakhmat ban pan tiket na ka party na Shillong Seat hynrei u la ong pat ba kane ka bynta kan sa shai tad haduh ba ka Cental Parliamentary Election Committee ka la shim ïa ka rai.
Halor ka jingkylli, utei u heh BJP u la ong ba ruh ba haduh mynta kam pat don kano kano kano ka dak ba u nongai ktien ka BJP, Bah M Kharkrang ba u kwah ban aireng ha kane ka elekshon MP.
Katkum ka jingong jong u, ka rai ba khatduh ka shong ha ki nongïalam ka party na Delhi ban ai ïa ka rai la kin sei kyrtong na Shillong bad Tura lane tang na kawei ka constituency.
“Mynta, ka NPP ruh kadei shi bynta jong ka sorkar NDA, kumta kaei ka rai ba shim ha ka samoi ba la dep shwa ka elekshon ba ki pynbna baroh ar tylli ki seat, hynrei mynta pat ym tip ki lah ban leh ne ki lah ban ym leh,” u la bynrap shuh shuh.
Ki khubor ba la ïohlum ki ïathuh ruh ba u President ba thymmai ka party, u Rikman G Momin un sa pynbna ha ka taiew ba nyngkong ïa ka kynhun treikam ba thymmai jong u. “Hynrei na bynta ka elekshon MP ïa kine yn sa shim rai da ki bor bahalor ka party hadien ka 03tarik Nohprah namar ha katei ka sngi yn sa pynbna ïa ka elekshon MLA ha ki san tylli ki jylla kumta hadien katei ka party kan sa shim ïa ka rai,” u la ong.
