Shillong, Lber 20 : Ki arngut ki Myntri Sorkar U bah Paul Lyngdoh myntri ka tnad kam jngohkai bad ka Arts and Culture bad Dr Ampareen Lyngdoh myntri ka tnad ka koit ka khiah bad kam rep kam riang ki la pynpaw ba kan jin da la long ka jingkmen kaba khraw ïa ki paid nongshong shnong ka jylla lada ka sorkar pdeng ka ai da u Lat uba nang ban kren da ka ktien ba ïasngewthuh lang ne nang ban kren Phareng.
ïa kane ki la pynpaw mynta ka sngi hadien ba u Lat ka jylla u la ai ka jingkren lamphang ha ka Dorbar Mang Tyngka da ka ktien Hindi kaba la pynlong wat ïa ki MLA ka VPP ruh ban mih jyndat napoh ka ïing Dorbar.
“Ngi dei ban pynshlur ïa ka ktien kaba ngi sngewthuh lang, hynrei ha kane ka bynta, ka jingpynpaw na ka liang ka jong ki (VPP) ka long ba une u Lat ym lait ban kren da ka English, hynrei ka Rule 28 jong ka Conduct of Business jong ka Assembly, ka ong ba uno uno u dkhot u lah ban kren da kano kano ka ktien lajong da kaba pyntip shwa ïa u Lamphang jong ka ïing Dorbar. Ha ka jingshisha ngin jin da la sngewtynnad ban ïohsngew ha ka ktien kaba ngi sngewthuh paidbah” ong u Bah Paul Lyngdoh.
Haba kylli la u sngewdei ba ka sorkar pdeng haba ka thung ïa ki Lat ha ka thaiñ shatei lam mihngi kadei ban thung da kiba nang ban kren ïa ka ktien phareng, u Bah Paul ula ong, “Kane kam dei ka sien kaba nyngkong ba u Lat un kren da ka ktien Hindi ha ïingdorbar hynrei kadei ka sien ka baar kaba jia , hynrei kan long kaba sngewtynad ban don da ki Lat kiba lah ban kren ia ka ktien kaba ngi ngin ïa lah ban sngewthuh lang lait nangta ngan ong shuh kumno pat”.
“Ngim dei kiba kren iaka ktien Hindi bad ka sorkar India ka dei ban tip ba ki paidbah ka jylla Meghalaya kim sngewthuh ïa ka ktien Hindi” ong ka Dr Ampareen namar ka jingmih ka jingpyrshah halor ka jingai jingkren u Lat ka jylla da ka ktien Hindi haka sngi sdang jong ka Dorbar Mang Tyngka.
Ka la ong, ba ka long kaba donkam ban ïakren halor ka jingbym lah ka jylla Meghalaya bad ki nongshong shnong ki jongka ban kren ne sngewthuh ïa ka ktien Hindi. Ka la ong ba u Lat uba lah ban kren ïa ka Ktien kaba iakren da ki paidbah, dei ban phah sha ka Jylla.
“Ka long kaba kongsan ban pynpaw ïa kane ka mat bad nga dap da ka jingkmen ba mynta ka kynti ruh la pynsngew biang ïa katei ka mat namar ka long kaba kongsan ban long kiba ïengskhem halor kane bad ngi donkam ban pynthikna ba ka sorkar India kadei ban tip ba ki paidbah ka Meghalaya kim sngewthuh ïa ka Hindi” ong ka Dr Ampareen.
Kala pynpaw ruh ba ki katto katne ki nongthawaiñ kila shem jingeh ban sngewthuh ia katei ka ktien kaba la kren wat ka la don lypa ka jingthoh halor katei ka jingkren kaba la sam sha ki nongthawaiñ.
Haba kylli balei kam shym la pyrshah haba la wanrah ïa katei ka mat hapoh ka jingïalang jong ka kynhun Myntri, ka Dr Ampareen ka la ong ba u Lat ka jylla um nang ban kren da kiwei pat ki jait ktien lait na ka Hindi bad kadei kaei kaei kaba kim shym la poi pyrkhat lypa ban ïakren hapoh ka jingïalang jong ka kynhun Myntri.
Watla ki MLA ka VPP kum ka dak jong ka jingpyrshah ïa ka jingkren u Lat ka jylla da ka Hindi ki la mih jyndat napoh ïing Dorbar, hynrei ym shym la don kiwei pat ki MLA na kiwei pat ki seng kiban ïasnohktilang bad ka seng VPP.
Ha kaba iadei bad ka jingmih jyndat jong ki MLA ka VPP, ka Dr Ampareen ka la ong, ba watla ka la don ha ka liang synshar kaba hap ban bud ïa ki kyndon treikam hynrei kala pynpaw pat ïaka jingsngewtynnad ba ki Liang Pyrshah kila kren halor katei ka mat.
Ka Dr Ampareen Lyngdoh kala kyntait pat ban ong eiei, la ka sorkar jylla ka dei ban phah da ka jingthoh sha ka sorkar pdeng ban thung ïa ki Lat ka jylla da kiba nang ban kren ïaka ktien phareng, hynrei kala pynpaw ba ïa katei ka mat dei ban pynsngew sha ka nongbah Delhi.
“Kan long kaba bha lada ngi pyntip sha Delhi, kam don kano kano ka jingma ban pyntip ïa ka sorkar India ban shimkhia halor kane ka mat” ong ka Dr Ampareen.
