Kut noh ka 2nd SSYWO Free Inter Inter School Knockout Football Tournament & School Sports Meet 2023 ha madan Marbañiang Umseiñïong

Shillong, Ïaïong 28 : Ka San Shnong Youth Welfare Organisation (SSYWO) ha ka sngi Thohdieng ka 28 tarik Ïaïong 2023 ka la ïoh ban pynkut noh ïa ka 2nd SSYWO Free Inter School Knockout Football Tournament & School Sports Meet 2023.
Ïa katei ka lympung ïalehkai kaba la sdang naduh ka 30 tarik u Lber ba la wan ban ïashim bynta da 28 tylli ki skul la ïoh ban pynkut noh ha kane ka sngi lyngba ki phainal jong ka jingïalehkai phutbol bad ka jingïaid march past ïa kaba la pynlong ha madan phutbol jong ka Shnong Marbañiang Umseiñïong, Upper Shillong.
Ha ka jingïalehkai phutbol ïa ka nam lahduh jong ki U-16 (Boys) la ïoh rah da ka He Mont’ Zenith Secondary School, Mylliem da kaba pynliem ïa ka Pomlum Hr. Seceondary School, Baniun kaba wan ba ar. Ha ka Above-16 ïa ka nam lahduh la ïoh rah da ka St. Peter Hr. Secondary School, Mawjrong kaba la pynliem ïa ka Kyntiew Shaphrang Hr. Secondary School, Laitlyngkot.
Katba ha ka liang ki kynthei, ka Ïewrynghep Secondary School, Mawñianglah ka la ïoh rah ïa ka nam lahduh hadien ba ka la ïoh ban pynliem ïa ka St. Paul’ Hr. Secondary School Mawngap. Ki skul kiba ïoh rah ïa ka nam lahduh ki ïoh mar 30,000 tyngka ha ryngkat ki trophy katba kiba wan ba ar ki ïoh mar 15,000 tyngka lem bad ki trophy.
Ha ka jingïaid march past, ka Seng Khasi Secondary School, Marbisu ka la khur nam jop ha baroh ar ba kynthup shynrang bad kynthei kiba la ïoh rah lang ryngkat ka song pisa kaba mar 5,000 tyngka lem bad ki trophy ba la sam sha baroh kiba la ïashim bynta.
Ka St. Paul’s Hr. Secondary School, Mawngap ka jop kyrdan ba ar bad ka Ram Krishna Mission, Mylliem ha ka kyrdan ba lai ha ka liang ki shynrang. Kaba jop kyrdan ba ar ha ka liang ki kynthei la ïoh da ka St. Paul’s Hr. Secondary School, Mawngap bad ka Springtime Secondary School, Sadew ka jop kyrdan ba lai.
Nalor ka phutbol bad ka march past, ka SSYWO ha kine ki ar taïew tam ka la ïoh ruh ban pynlong ïa ki jingïalehkai track and field, kum ka 100m race, 200m race, 800m race, relay race (4x100m), relay race (4x200Mm), high jump bad ka long jump.
Ha ka jingïalehkai phutbol la sam ruh ïa ki khusnam shimet ba kynthup ka nam top scorer, ha ka liang ki kynthei la ïoh da ka Bandarishisha Kharumnuid, jong ka Umthli Secondary School. Ïa ka nam Best Player jong ki Above-16 (boys) la ïoh da u Ehboklong Nongrum, jong ka Kyntiew Shaphrang Hr. Sec. School.
Best Player jong ki Under-16 (Boys) la ïoh da u Nangteibanshembha Kharbangar jong ka He Mont Zenith, Mylliem, ïa ka nam Best Player ha ka liang ki kynthei la ïoh da ka Inrila-i-dor Khongthaw, jong ka Iewrynghep SS, Mawñianglah. Ïa ka nam Best Goalkeeper jong ki Above-16 (Boys) la ïoh da u Mebanshanskhem Kurkalang, jong ka St. Peter’s Hr.Sec. Mawjrong.
Best Goalkeeper la ïoh rah da ka Beandahun Ryntathiang, jong ka Carmel School, Sadew, ïa ka nam Best Discipline Team jong ki Above-16 (Boys) la ïoh rah da ka RMSA Secodary School, 12 Mer Mylliem, ha ka Under-16 (Boys) la ïoh rah da ka Umthli Secondary School, Umthli bad ïa ka nam Best Discipline Team jong ki kynthei la ïoh rah da ka Carmel School Sadew.
Ka SSYWO ka la sdang nyngkong ban pynlong ïa katei ka lympung da ka phutbol ha u snem 2022 bad da ka thong ban nang kyntiew shuh shuh ïa ki khynnah kiba donsap ha kiwei pat ki jait jingïalehkai, mynta u snem ka la ïoh ban pynlong sa ki jingïalehkai track & field, kaba la long shisha ka jingïarap ïa kito ki khynnah kibym ïoh lad ban ïalehkai kum ha ki District bad State level ban pyni ïa ki sap ïalehkai ba ki don.
Ka SSYWO kadei kawei ka kynhun ba don 150 ngut ki dkhot bad ki la lah ban pynlong ïa kane ka lympung ïalehkai khlem da pan jingsiew na ki skul ba ïashim bynta lyngba ka jingïasynñiang pisa para dkhot. Ym tang ba ka pynïalehkai ei, hynrei ka pynbiang ruh kiwei ki jingdonkam kum ka bam ka dih na ka bynta ki nonghikai bad ki khynnah skul.
Niar ban lap ne shem ïa kaba kum kane ka kynhun, nalor ba ka pynïalehkai ei, ka sam ruh ki khusnam song pisa sha ki skul kiba jop bad sam ïa ki trophy sha kito ki khynnah skul kiba ïashim bynta ha ki jingïalehkai kum ha ka march past kaba la pynkmen eh shi katdei na bynta jong ki ba ki khlem leit phai ïing thylli, hynrei ryngkat ki jingbuh sah jingkynmaw.
Ha kane ka sngi pynkut ïa kane ka lympung, la wan ban sakhi lang naduh ki nongkitkam ka SSYWO, ki nonghikai skul, ki kmie ki kpa, ki khynnah skul, ki riew rangbah bad kiwei kiwei kiba la shah khot sngewbha.