Jowai, Ïaïong 28 : Ïa ka Chief Minister District Level Inter School Athletic Meet 2023 ka West Jaiñtia Hills District, ba la pynïaid da ka ophis u District Sports Officer (DSO) West Jaiñtia Hills District, ryngkat ka jingïatreilang ka West Jaiñtia District Sport Association (WJDSA), kaba lai sngi lynter naduh ka 26 tarik la pynkut noh mynta ka sngi 28 tarik ha Madan Kiang Nangbah Stadium, Dongmihsngi Jowai.
Mynta ka sngi pynkut la wan ban pynhap pyrda ïa lama jong kane ka lehkai spors da u MLA ka Jowai uba long ruh u Chairman ka MUDA ma Wailadmiki Shylla, ïa ka nam Over All Champion School la ïoh rah da ka North Liberty Higher Secondary School, Jowai katba ïa ka nam Best Discipline School la ioh rah da ka St: Marry Mazzarello Secondary School Jowai. Ha kane ka lympung la sam ruh ïa ka khusnam sha ki Best Athletic ha ki kyrdan Under-14, 16 bad 18 na ka bynta ki khynnah shynrang bad khynthei.
U ma Wailadmiki Shylla kum u kongsan haba ai jingkren ula ong ba dap da ka jingkmeh ban ïohi ïaki khynnah skul ba ki shim bynta ha ki jingïalehkai bapher bapher ha kane ka lympung kiba don shisha kata ka sap, kumta na ka liang jong u, u kyntu jur ba kin long kiba trei shitom shuh shum ha ka sap ba ki don, da kaba ong ruh wat ai ba kan kut tang hangne.
Shuh shuh u ma Wailad ula ai khublei ruh ïa ka ophis jong u District Sports Officer WJHD kumjuh ïa ka WJDSA kiba la pyïaid beit pynïaid ryntih ïa kane ka lympung kaba la wan ban shim bynta haduh 31 tylli ki skul napoh ka District bad ka dei ruh ka sien kaba bun duh ki skul ban shim bynta lada nujor ba ki snem ba la leit.
Ïa ki khusnam bad syrnod sha ki nongjop la sam da u kongsan ma Wailadmiki Shylla, ma K. Passah DSO WJHD, ma E.M.H. Passah Working President WJDSA, ma P. Lamare Vice President WJDSA nalor kiwei kiwei de.
