Mawkyrwat, Ïaïong 28 : Ka Nongbri Brothers Football Club ka la long kawei na ki 16 tylli ki kynhun ba la rah ïa ka nam lahduh ha ka lympung ïalehkai kynjatbol ba la tip kum ka Mawlangwir Football Community Shield 2022-2023 ba la pynïaid da ka Mawlangwir Sports Club hapoh Madan Saitsnad, Mawlangwir, South West Khasi Hills District, Mawkyrwat.
Haba phai ha ka jingïalehkai, ha ka kyllastep ka Se Lajong Football Club bad ka Nongbri Brothers Football Club ki la lah ban ïalehkai bha bad pynshoh biej ruh ïa ki nongpeit kai namar da ka jinglah jong ki ban pyni ïa ka jingtbit ban pashad bol bad ym tang kata haduh ba kut jong ki minit ha ka kyllastep baroh ar tylli ki kynhun kim shym la lah ban ïa pynjar wat kawei ruh.
Haba wan biang ha ka jingïalehkai jong ka kyllamiet pat, baroh ar tylli ki kynhun kim shym la duh jingkyrmen hynrei ki la ïa pyni hi ïa ka jinglah jong ki ha kaba kynting ïa ka bol ne wat ban ïa pyrshang ban ïa pynkhih jar hynrei phewse ki jingpyrshang jong ki kim shym la urlong kumba ki thmu bad wat ha kane ka minit ruh haduh ba kut kim shym la ïoh ban ïa pynkhih. Nangta, ki nongpynïaid ki la pynïaleh noh da ka extra time ba mar 7:30 minit bad ha kane ruh kim shym la lah ban pynurlong.
Namarkata, ban rai ïa ka kynhun kaba jop ki nongpynïaid ki la shu pynleh da ka Tie Breaker ha kaba ka Nongbri Brothers Football Club ka la lah ban pynliem noh da 6 – 5 kol pyrshah ïa ka Se Lajong Football Club bad rah syndon ïa ka nam lahduh.
Ha kaba kut jong ka jingïalehkai, la ïoh ruh ban sam ïa ki khusnam sha baroh ar tylli ki kynhun kata kaba poi sha ka thong jong ka jingjop ka Nongbri Brothers Football Club da ka khusnam bad ka song pisa kaba T. 3 lak bad kaba la shah rem noh ka Se Lajong Football Club da ka khusnam bad ka song pisa kaba T. 1.30 lak.
Haba phai ha ka jingïalehkai ban ïa knieh ïa ka nam ba lai, ïa ka nam jop la rah da ka Lamare Sports Club.
U kongsan ha kane ka sngi u dei u bah Renikton Lyngdoh Tongkhar, MLA ka Mawkyrwat Constituency bad haba ai jingkren u la pynpaw ka jingaikhublei na ka bynta ka Mawlangwir Sports Club kaba la lah ban pynlong ïa kum kane ka jingïalehkai kaba long ruh ka lympung kaba heh hapoh jong ka thaiñ. “Lyngba kane ka lympung kan long ruh kawei na ki lad ban pyni, ai mynsiem na ka bynta kito ki ‘rangïalehkai ban don ha ki ka mynsiem jong ka jingïaleh bad ba ki don ka thong ha ka jingim ba ym tang ba kin kut tang hapoh la ki jong ki jaka hynrei ba kin lah ruh ban kiew sha kiwei de jaka”, u la ai mynsiem.
Ha kajuh ka por u bah Renikton ula mynsiem ruh ïa ki ‘rangïalehkai jong ki ar tylli ki kynhun kiba la poi sha ka wat ba khaduh ba kin ïalehkai bha bad kin buh ha ki ïa ka mynsiem jong ka jingïakhun khnang ba ka kynhun jong ki kan poi sha ka thong jong ka jingjop.
Ha kane ka sngi la pynshit pynshngaiñ ïa kane ka lympung ïalehkai da ka jingïadonlang naduh ki riew rangbah jong ka dong ka thaiñ kata u bah Carness Sohshang, MDC ka Mawkyrwat Constituency u long kum u Symbud Kongsan, u bah H.S. Diengdoh, MCS, SDO ka Ranikor Civil Sub Division (ba la shongthait) lem bad kiwei de ki ‘riew rangbah jong ka dong ka thaiñ lem bad ki paidbah nongwan peit ïa ka jingïalehkai kiba dei ki riew ieid phutbol.
