Ngam dei ma nga ka trai ban pynkynriah, khie leit ong ïa ki trai ïing: Ampareen

Shillong, ïaïong 27: Ka Dr. Ampareen Lyngdoh, MLA jong ka East Shillong haba kynthoh ïa ka jingdawa ka Dorbar Shnong Laitumkhrah Pyllun ban pynkynriah noh ïa ki jaka sah ki kharmetor na Lum Sohra, Laitumkhrah, ka la ong ba dei ka Shillong Municipal Board ban rai namar kane kadei ka jaka kadei jong ka SMB.
Hynnin ka Sngi u Rangbah Shnong jong ka Laitumkhrah Pyllun, u Bah Andrew J. Jyrwa, u la ong ba ka Shnong ka dawa biang sa shisien na ka sorkar ba kan pynkynriah lang ïa ki kharmetor na Laitumkhrah sha ka jaka ba ka thmu ban pynkynriah ïa ki kharmetor na Them ïew Mawlong.
“Ka Dorbar Shnong kala ju phah jingthoh na ka por sha ka por ban kynkynriah noh ïa ki na katei ka jaka, hynrei ka sorkar kam ju patiaw satia ïa kane ka jingdawa”, la ong u Bah Andrew, da kaba bynrap ba na kane ka jaka la mih shibun ki jingsniew bad ki kam beaiñ nalor ba ki briew ba wan sah ki la nang bun katba nang mih sngi.
Haba ki nongthoh khubor ki la twad jingmut na ka Kong Ampareen, kaba long ka Myntri ha ka sorkar, ka la ong ba kam dei ka trai jong kane ka jaka, ka trai kadei ka SMB bad dei ban leit sha ki ban dawa.
Ha kajuh ka por ka la ong ba kam pat ju ïoh jingthoh na ka Dorbar Shnong halor kane ka jingdawa pynkyn riah ïa kine ki briew. Ka la kynthoh ruh ba haba ka Shnong ka kren shaphang ka jingpyntuid jakhlia sha ka wah Thangsniang, kadei ban peit ruh ïa kiwei de ki dong ne ki jaka sah, ym dei ban peit tang sha katei ka Colony.
Da kaba pynpaw ba kam iashah liang ïano ïano ruh halor kane ka kam, ka Kong Ampareen, ka la ong ba kam kwah pat ba na ka bynta kane kan mih ka jingïaklumar bad ka jinghiar ka suk ka saiñ.
Ka la ong ruh ba haba pyrshah ne dawa dei ban leh katkum ki nongrim. Ka la kynthah ruh ba kane ka jingleh ka lah ban dei ka jingïakhleh politik jongno re jongno.