Ka jingpynduh syrnot ST ïa ki Khasi ai jait Kpa ka dei ka jingïuhroit ïa ka longbriew manbriew: SRT

By Mawphor News Desk On Apr 28, 2023

Shillong, ïaïong, 27: Ka Syngkhong Rympei Thymmai (SRT) ha ka sngi Palei ka la sangah tyngeh ïa ka Khasi Hills Autnomous District Council (KHADC) kaba la pynmih ïa ka hukum kaba la bthah ïa ki khlieh nongsynshar ba kim dei ban ai ïa ka No Objection Certificate (NoC) sha ki Khasi kiba ai jait kpa kiba kwah ban aplai ïa ka syrnot Schedule Tribe (ST).
“Ka jingpynduh syrnot Schedule Tribe ïa ki khun kiba ai jait sha u Kpa katkum ka Section 2 bad 12 jong ka Khasi Hills Autonomous District (Khasi Social Custom of Lineage) Act, 1997 ka dei ka jingiuhroit ïa ka longbriew ka manbriew katkum ka Riti Synshar jong ka ri India,” ong u President ka Syngkhong Rympei Thymmai (SRT) u Bah Teibor Khongji ha ka jingïakren bad ki lad pathai khubor.
U la ïathuh ba ha ki snem baladep, ka SRT ka la phah ïa ka dorkhas sha u Myntri Rangbah ka Jylla hadien ba ki Khasi kiba ai jait kpa ki la shah pyndik bad shah pynslem jin hynriew bnai haduh shi snem haba ki aplai tang ban ïoh ïa ka syrnot Schedule Tribe. Ïa kane ka ishu ka tnat Political ka la ïasyllok bad ka tnat Social Welfare, ka tnat Law bad ka tnat District Council Affairs (DCA).
“Ka hukum jong ka District Council ban pynduh syrnot Schedule Tribe ïa ki khun Khasi kiba ai jait sha u kpa ka long kaba be-aiñ. Ka pynshisha ïa kane namarba ngi don ïa ka jubab RTI kaba ngi la pan na ka ophis u Deputy Commissioner jong ka East Khasi Hills District,” la bynrap u Bah Khongji.
Haba kynthoh halor ka jingwanrah jong ka KHADC ban pynbeit thymmai ïa ka Khasi Hills Autonomous District (Khasi Social Custom of Lineage) Act, 1997, u President jong ka SRT u la ong, “ka jingpynbeit thymmai ïa ka Khasi Social Custom of Lineage, Act, 1997 ngi lap ba ki don ki mat bad ki kyndon kiba iuhroit bad kiba shu leh shiliang ïa ka hok longbriew manbriew katkum ka Riti Synshar jong ka ri India.”
U la ong ba ka SRT ha ka 18 tarik, Naitung, 2022 ka la phah da ka dorkhas sha u Lat ka Jylla hadien ba la lap ba ki mat bad ki kyndon ba la bsut hapoh ka Khasi Social Custom of Clan Adminstration Bill 2020 ki long kiba shah shilinag bad ki bym ïahap bad ka Riti Synshar jong ka ri India.
“Hadien ba u Lat u la bishar sani bha, ha ka 6 tarik, 2019, u la ong ba katkum ka Article 21 ka kdew shai ba uno uno u briew um dei ban shah pynduh noh ïa ki hok shimet lait noh tang lada don da ka aiñ,” la bynrap u Bah Khongji.
Katkum ka jingong jong u Bah Khongji, ka jingai jingithuh ïa ki Shaw Bhoi ban ïoh syrnot Schedule Tribe ka long kumba leh shiliang khmat ïa ki khun Khasi kiba ai jait sha u kpa.
“Kam long satia kaba dei ba ïa ki Khasi paka kiba ai jait sha u kpa kin shah pynduh ban ïoh ïa ka Syrnot Schedule Tribe katba ïa kito kiba kmie ka dei ka Khasi katba u Kpa pat u dei u khyllah jait kin ïoh Syrnot Schedule Tribe tang namarba ki ai jait sha ka Kmie. Kane ka long ka bym lah satia ban pdiang daleilei ruh em,” la bynrap u Bah Khongji.
“Namarkata, ngi dawa ïa ka District Council ba ka dei ban pynduh pyndam mardor ïa ka hukum ba ka la pynmih namarba kane ka ktah shiliang ïa ki khun Khasi kiba ai ai jait sha u kpa, katba ïa ki Khasi shiteng kiba ïoh kpa da u khyllah jait hynrei tang namarba ki ai jait sha ka Kmie ki ïoh ïa ka syrnot ST,” la ong shuh shuh une u nongïalam ka SRT.