Ngi ruh ngi sngewlehraiñ ban khot da ki bor pahara nabar, hynrei ba phim leh, ngim banse

Pan por ka sorkar pdeng halor ka jingpan pyrton Pulit

Shillong, Ïaïong 27: U Chief Justice (CJ) ka High Court of Meghalayat u Sanjib Banarjee u la ong ba ka jinghap pynmih hukum ka Kashari ban pan pyrton pulit na ka sorkar pdeng ban wan tehlakam ïa ka jingkhaïi be-aiñ ïa u dewïong ka dei namar ba ki pulit ka sorkar jylla kim shym la leh la ka kamram ba ki dei hok ban leh bad ong ba na ka liang ka Kashari ruh ka don ka jingsngew lehraiñ ba kum kine kiei kiei ka hap ban shim rai.
Haba kynthoh (oral remark) ha ka por ba ka Kashari jong ki laingut ki nongbishar ba kynthup ïa u Chief Justice ka High Court of Meghalaya u Justice Sanjib Banerjee, Chief Justice, u Justice H. S. Thangkhiew, bad u Justice W. Diengdoh ka dang shong bishar ïa ka PIL halor ka jingkhaïi bad ka jingtih be-aiñ ïa u dewïong, u CJ u la ong ba dei hadien ba ka Kashari ka lap ba kam don da kawei pat ka lad na bynta ban teh lakam ïa ka jingtih bad shalan be-aiñ ïa u dewïong ba ka hap ban pan pyrton pulit na ka sorkar pdeng.
“Na ka liang ka sorkar ka la kam ba ka la pyrshang ban teh lakam ïa ka jingkhaïi bad ka jingtih be-aiñ ïa u dewïong wat la na ka liang ka Kashari kam lah ban ngeit ïa kane hynrei ngi kwah ban pyntip ba na ka liang jong ngi ruh kam dei kaei kaei kaba ngimsngew khyllew ban pan pyrton pulit na ka sorkar pdeng kumba ka sorkar ruh ka sngew hynrei dei namar ba ngim don lad shuh da kumwei na bynta ban pyntreikam ïa ka hukum ka Supreme Court. Jin lada ngi ïohi ïa ka jingpyrshang ba shida na ka liang ka sorkar jylla ïa kane ka kam, ngin ym donkam pan jingïarap da ki pulit kiba na bar,” ong u CJ ha ka jingkynthoh.
Na ka liang u Additional Advocate General ka sorkar jylla u K Khan u la pyntip ha u CJ ba na ka liang ka sorkar ka la leh ïa kaba bhatam kat kum ka jingkotbor na bynta ban tehlakam ïa ka jingtih dewïong be-aiñ bad kumjuh ka jingshalan be-aiñ.
“Lada ngi peit ïa ka jingïoh kem ïa ki trok ba kit dewïong be-aiñ ka la kiew ha une u snem namar ngi la pyrshang ïa kaba bhatam bad kat kum ka affidavit ba ngi la aiti ha ka 15 tarik u Rymphang ngi la kdew ba ka jingïoh kurup trok kit dewïong ha u snem 2022 haduh u Kyllalyngkot 2023 ka la poi haduh 31 tylli case” ong u K Khan.
“Kum ka Kasari kam dei ba ngi kwah ïaid lait ïa ka sorkar hynrei ka dei namar ba ngi kut lad ba ka poi haduh u pud ba ngi hap ban pan jingïarap da na ki pulit kiba na bar,” ong biang CJ.
Na ka liang u K Khan u la ïathuh ba ka sorkar ka la pyrshang ban pynbeit ryntih ïa kane bad ban bud ryngkhi ïa ki jingbthah ka kasshari.
Haba ïadei bad ka hukum ka Kashari ba ka la pynmih ha ka 12 tarik Ïaïong ba ka sorkar pdeng kan jubab halor ka jingbthah ka HC ban pynpoi 10 pyrton ki pulit Central Armed Police Force (CAPF) na bynta ba kin peitngor ïa ka jingtih bad shalan be-aiñ ïa u dewïong, na ka liang ka sorkar pdeng lyngba u muktiar jong ka u Dr N Mozika u la pyntip ba ka tnat ki kam pohïing ka sorkar pdeng, ka donkam biang ba ka HC kan ai por sa 4 taiew na bynta ban jubab bad pyntreikam ïa ka hukum ka HC.
“Namar ka sorkar pdeng ka pan por ha kaba ïadei bad ka hukum ban pynpoi ïa 10 pyrton ki pulit CAPF, ngin shim bishar biang ïa kane ha kine ki sngi ban wan bad ngi ai por 15 sngi ïa ka sorkar pdeng,” ong ka hukum ba la pynmih da ka Kashari.
Shuh shuh ha ka hukum ka HC ka ong ba namar ka jingsiew sha u Justice Katakey ka dang duna palat, ka HC ka la bthah ban pynlait marmar sa 3 lak tyngka sha u Justice Katakey.
Na ka liang ka Kashari kan sa shim bishar biang ïa kane ha ka 15 tarik Jymmang pyntip u CJ.