Ba mih tang ka kyrteng kum ki nongïoh skhim pan jingshai ki 14 ngut na u Bah Samlin

Shillong, Ïaïong 27: Ki 14 ngut ki nongshong shnong ka Sohïong Constituency ha ka sngi Palei ki la dawa na u MLA barim Bah Samlin Malngiang ban pynshai paidbah halor ka jingmih kyrteng jong ki 14 ngut kum ki nongïoh jingmyntoi na ka MLA Scheme kaba la mang ha naduh u 2018 haduh 2022 katba na ka liang jong ki pat kim shym la ïoh pdiang satia ïa kane ka skhim.
Haba kren sha ki lad pathai khubor u Bah John Wankhar u la ïathuh ba haduh mynta ki don kumba 14 ngut ki nongshong shnong na ki shnong kiba hap hapoh Sohïong Constituency kiba khlem pat ïoh pisa ba la mang lyngba ka SRWP scheme 2018-2022 watla ka kyrteng jong ki ka paw haka thup ba la ïoh ïa kane ka skhim katkum ka jingtip ba ki ïoh lyngba ka RTI na ka ophis u Block Development Officer ka Sohïong C& RD Block.
U Bah John ula pynpaw ïa ka jingsngewdiaw bad ka jingsngewkhia halor ka jingmih tang ki kyrteng kum ki nongïoh jingmyntoi katba ha ka jingshisha kat haduh mynta kine ki 14 ngut kim shym pat la ïoh satia.
“Katkum ka RTI ba la ïoh naka ophis C&RD Block Sohïong haka 12 tarik Naitung 2022, ka pynpaw ba ki kyrteng jong ki 15 ngut kum kiba la ïoh ïa ka song pisa ba 10 bad 20 hajar na ka skhim MLA hynrei ha ka jingshisha tang iwei iba ïoh “ ong u Bah John.
“Ngi kwah ban pan jingshai na u MLA barim shano ka pisa jong kine ki 14 ngut ka jah kaba ki la dei ban ïoh kumba ka paw ha ka RTI,” u la bynrap
Ka Kong Wandalin Khongsit na ka shnong Kharlakhar, ka la ïathuh ba ka kyrteng jong ka, ka paw ha ka thup ban ïoh ïa ka pisa ba kot T.10,000 na ka skhim SRWP scheme hynrei haduh mynta kane ka pisa kam pat poi ha ka Bank Account.
Ka Kong Wandalin ka la pynpaw ba kane ka jingleh jong u MLA barim Bah Samlin Malngiang ka la buh ïa ki nongshong shnong ka Sohïong ha ka umdum khamtam ïa kiba la mih kyrteng hynrei kiba khlem ïoh pat ïa ki jingmyntoi.