Yn leit khyllie biang ka sorkar ïa ka ILP, Ktien Khasi-Garo sha Delhi

Shillong, Ïaiong 26 : Ka sorkar jylla ka la pynkhreh ban leit buddien biang ïa ka ishu Inner Line Permit (ILP) bad ruh ïa ka ishu Ktien Khasi bad Garo na ka sorkar pdeng hadien ba ka elekshon jied nongmihkhmat ha Sohiong ka la dep.
Lah ban kdew hangne ba ka jingthep vote ha Sohiong kan long ha ka 10tarik Jymmang mynta u snem katba ka jingñiew vote pat kan long ha ka 13tarik utei u bnai hi.
U Symbud Myntri Rangbah ka Jylla, Bah Prestone Tynsong u la ïathuh ruh da kaba ong, “Ynda la dep ka elekshon u Myntri Rangbah bad manga ngin leit buddien bha ïa kine ki ishu kiba dang sah na ka sorkar India.”
Katkukm ka jingong jong u, ka sorkar India kadei ban sngap ïa ki jingangnud jong ki paidbah ka jylla baroh ban ïoh noh ïa ka ILP bad ruh ba ka Ktien Khasi bad Garo kan rung noh ha ka Khyrnit kaba Phra jong ka Riti Synshar jong ka Ri.
Shwa kane, u Bah Prestone u la ïathuh ruh ba mynshwa ha ka por ba ïalam u Dr. Mukul Sangma kum u Myntri Rangbah ka jylla, um shym la pdiang satia ban kren ïa ka ishu ILP. U ong ruh ba ha katei ka por wat ki sengbhalang ki shym lah ban leh ei ei.
“Hynrei ka sorkar jongngi pat ka khot lang ïa baroh ki sengbhalang, ki sengsaiñ pyrthei bad ruh ki kynhun niam ban tylli lang kawei ïa kitei ki ishu ba donkam eh kum ka ILP bad ruh ïa ka Ktien Khasi bad Garo khnang ba ngin lah ban pynurlong ïa ka jingangnud ki paidbah ka jylla jongngi,” u la bynrap shuh shuh.