Shillong, ïaïong, 27: Ka National Hynniewtrep People’s Federation (NHPF) ha ka sngi Palei ka la mudui da ka ejahar ha ka ophis jong u Superintendent of Police ka East Khasi Hills District pyrshah ïa ka Rumi Chowdhury kaba na ka jylla Assam halor ka jingkynnoh ba ka la pynngop bad shukor ïa ki paidbah jong ka jylla Meghalaya da kaba phah ban thep pisa 1 lak tyngka na ka bynta ban ïoh ïa ka pisa kaba 2 lak tyngka.
Ha ka jingïakren bad ki lad pathai khubor, u President jong ka Federation u Bah Andreas Nongkynrih ula kynnoh ba ka Rumi Chowdhury lem bad uwei u rangbah ïa uba la tip kyrteng kum u Rjib napoh ka jylla Assam ki la thok bad pyngnop ïa ki paidbah lyngba ka rynsan Social Media da kaba ki la bthah ïa ki paidbah ban thep pisa 1 lak tyngka khnang ba kin ïohnong 3 lak haduh 4 lak tyngka.
Haba ïadei bad kane, u Bah Andreas u la kyntu ïa ka tnat Pulit ba kan pynlong ïa ka jingtohkit kaba bniah halor kane khnang ba ki paidbah jong kane ka jylla Meghalaya kin lait na kum kine ki jingshah pynngop bad ki jingshah pynthame ha ki riewshim kabu.
