Jur ka dheng kali ha Jowai ba kiar ïaid na surok jot Jowai Bye-pass

Shillong, ïaïong, 27: Ka Khasi Students Union West Jaintia Hills District Unit ha ka sngi Palei ka la aiti da ka dorkhas ha u Symbud Myntri Rangbah ka Jylla uba peit ruh ïa ka tnat PWD (Roads) ban pyntip ha kaba ïadei bad ka jingjot rathai jong ka surok Jowai Bye-Pass naduh Thadlaskein haduh Soo-Mer, Jowai.
Na ka liang jong u Symbud Myntri Rangbah u la pyntip sha ki nongïalam ka Seng ba ïa kane ka surok la dep ai ïa ka Work Order na ka bynta ban maramot noh ïa ka surok Jowai Bye-pass.
Ka seng ka la pyntip ba ka jingjot shaba palat jong ka surok Jowai-Pass ka la pynlong ïa ki nongñiah kali ban rung lyngba ka sor Jowai kat haduh ba ka la wanrah ïa ka jingdheng kali kaba shyrkhei hapoh kane ka sor.
Ha kaba ïadei bad kane, ka seng ka la kyrpad ïa u Symbud Myntri Rangbah ban phah maramot noh mardor khnang ba ki paidbah kin ïoh ban pyndonkam noh kham kloi ïa ka surok Jowai Bye Pass kaba long ruh u budlum jong ka leit ka wan bad ka rah ka rong jong ki paidbah ka East bad ka West Jaintia Hills District.
“Lyngba ka jingkular jong u Symbud Myntri Rangbah ngi khmihlynti ba ka kam kan sdang noh shaid shaid ban pynsuk ïa ki paidbah nongleit nongwan,” la ong u Bah Syngkrem.