Ba rem palat ka bai skul ha ki skul Private ujor ka UHM ha u Myntri ka tnat Pule Puthi

0

Shillong, ïaïong, 27: Ka United Hynniewtrep Movement ha ka sngi Palei ka la ujor sha u Myntri ka tnat Pule Puthi jong ka Sorkar Jylla u Rakkam A. Sangma da kaba aiti ha u ïa ka dorkhas halor ka jingleh mon shaba palat jong ki skul ba la pynïaid da ki riewshimet ban pynkiew bai skul manla u snem kaba la ktah haduh katta katta ki khynnah kiba wan na ki longing longsem kiba kham duna ka ïoh ka kot.
“Ngi kyrpad ïa u Myntri ka tnat Pule Puthi ba un khmih bniah halor kane khnang ba ka Sorkar kan pynmih da ka rai ha kaba ïadei bad ka jingsiew bai skul sha baroh ki skul shimet khnang ban khanglad ïa ka jingpynkiew bai skul bad ïa kiwei kiwei ki jingsiew kiba manla u snem,” ong u Vice President u Bah Kenneth Jana ha ka jingïakren bad ki lad pathai khubor hadien ka jingïakynduh ïa u Sangma.
Ka Seng ka la kyntu ruh ïa ka tnat Pule Puthi jong ka Sorkar Jylla ba kan shimkhia halor ka jingbthah jong ki bor pynïaid skul shimet ïa ki kmie ki kpa jong ki khynnah skul ban thied ïa ki Uniform bad ki kot skul na ki skul lane na ki dukan ba ki jied hi ha kaba kine ki dukan ki oh da ka dor ka bym ïahap satia.
“Kum kine ki jingjia ki buh jingeh haduh katta katta ïa ki longiing kiba duna ka ïoh ka kot. Ka dei ka kamram jong ka Sorkar ban bthah ïa kine ki skul ba kim dei ban phah thied ïa ki Uniform bad ïa ki kot skul na ki dukan namarba ïa ki Uniform lada thied na kiwei kiwei ki dukan lah ban ïoh ha ka dor kaba jem bad ban thied ïa ki kot na ki dukan die kot kiba die ïa kijuh ki kot skul,” ong une u nongïalam ka Seng.
Ha ka dorkhas, ka seng ka la pynpaw ba katkum ka Right to Education (Article 21 A) jong ka Riti Synshar ka ri India, manla ki khynnah kiba hapoh ka rta kaba 6 snem haduh 14 snem ki dei ban ïoh shong skul ei. “Ka dei ka kamram jong ka Sorkar ban peit ba ki khynnah kiba hapoh ka rta ki dei ban ïoh shong skul ei ha ki skul Sorkar bad ha ki skul ba la bei jingïarap da ka Sorkar bad lada ka long kaba lah wat ha ki skul Private ba la pynïaid da ki Trust, ki riewshimet ba la pynïaid da ki mishoneri,” ong ka Seng.
“Ka Sorkar ka dei ban bthah ïa ki bor pynïaid skul ba ki dei ban pynrung skul la kumno kumno 5-10 ngut ïa ki khynnah kiba wan na ki longiing kiba duk ba kyrduh manla ka Academic Session khlem da shim pisa bai rung skul bad ka bai skul bad ban ai ei ïa ki kot pule khnang ba kin ïohlad ban pule bad ba shisien ka sngi kin long ki païa bakhlaiñ jong ka imlang ka sahlang bad ka lawei jong ka jylla,” la bynrap ka dorkhas jong ka seng.
Ha kajuh ka por, ka seng ka la dawa ba dei ban pyndait ïa ki kor CCTV ha baroh ki skul Sorkar hapoh ki kamra klas bad kumjuh ha phyllaw jong ka skul khnang ba yn dup lah ban ïohi kyndiang ïa kino kino ki kam ba la leh da ki khynnah skul bad ban lap la ki nonghikai ki leit neem manla ka sngi ban pyndep ïa la ka kamram.

Leave A Reply

Your email address will not be published.