Kum u CA, leit jurip u Bah Hamlet ïa ki tyllong um bad skim JJM ha Sangmeiñ

Shillong, Ïaiong 27 : U MLA barim ka Mylliem Bah Hamletson Dohling, ba dei ruh u Chief Adviser jong u Myntri Rangbah ka jylla, ha ka step sngi Balang u la leit jurip hi dalade sha Um-paitmaw-Lum Shyllong ban buddien ïa ka jingpyntreikam ïa ka skhim Jal Jeevan Mission (JJM) ban pynpoi umbam umdih ha ka shnong Umlyngka bad Nongkseh kiba dei ki shnong kiba hap ha ka census town kaba la pynïoh hi da ma u.
Ha kane ka sngi, u Bah Hamlet u la leit jurip ruh ïa ki tyllong um kiban pynpoi ïa ka skhim JJM sha ka shnong Nongkseh bad Umlyngka, kaba don ha Umpaitmaw, Sangmein, Upper Shillong.
Na ka liang jong u haba kren bad ki lad pathai khubor u la ïathuh ba ka jingwan jurip jong u ka long ban pyntikna ba katei ka skhim ka dei ban sdang noh shaid shaid khnang ba yn lah ban pyndep ha ka por ba biang. Ha Nongkseh, ka Tnad PHE kala mang 15.84 klur ban pyntreikam ïa ka skhim na ka bynta ki 1230 tylli ki longiing katba ha Umlyngka la mang 28.89 klur na ka bynta ki 2242 tylli ki longiing.
Ha kane kajuh ka sngi, u Bah Hamlet u la ïathuh ba yn ksam um haduh 6 tylli ha Umlyngka bad 2 tylli ha Nongkseh khnang ban lah pyndap ïa ka jingdonkam um ha shnong. U la kyntu ruh ïa ki engineer bad ïa ki SDO ba kin peit ba ka kam kan ïaid stet na bynta ka jingmyntoi ki nongshong shnong.
Na ka liang u Bah Stephan Lyngdoh Rangbah Shnong ka Umlyngka u la pynpaw ka jingsngewnguh ïa ki ophisar ka tnad PHE ba ruh ïa u Bah Hamlet kiba la trei shitom bad pynrung kyrpang ïa katei ka skim JJM ha Umlyngka. U pynpaw ruh ka jingkyrmen ba kane ka skim kan ïarap shibun ïa ki paidbah nongshong shnong ynda la dep ka kam.
La donlang ruh ha kane ka sngi naduh ki Rangbah Shnong ka Umlyngka, ki Engineer, SDO, ki ophisar naka tnad PHE bad kiwei kiwei.