Ujor ka KSU ha u Dy. CM ba talasi ki shipai BSF ïa ki kali ba wan na Jowai-Amlarem-Muktapur

Shillong, ïaïong, 27: Ka Khasi Students Union (KSU) West Jaiñtia Hills District Unit ha ka sngi Palei ka la mudui pyrshah ïa ki shipai Border Security Force (BSF) ha u Symbud Myntri Rangbah ka Jylla uba peit ïa ka tnat Kam Pohing u Bah Prestone Tynsong halor ka jingpyndik bad ka jingpynwit shaba palat jong ki shipai Border Security Force (BSF) ïa ki kali kiba ïaid lyngba surok Jowai terter sha Amlarem bad ha shilynter jong ka surok na Amlarem ter ter shaduh Muktapur.
Ha ka jingïakren bad ki lad pathai khubor u President ka seng u Bah Laitphar Syngkrem u la ong, b aka seng ka la ïoh ïa kane ka ujor na kiba bun ki paidbah nongleit nongwan khamtam kiba sah ha Riwar Jaiñtia kiba la ud haduh katta katta ïa ka jingpyndik jong ki shipai BSF.
U la ïathuh ba u Symbud Myntri Rangbah u la bthah ïa u Deputy Commissioner jong ka West Jaiñtia Hills u Bah BS Sohliya ba un khot jingïalang ïa ki ophisar shipai BSF ban ïakren halor kane ka jingeh jong ki paidbah.
Shuh shuh u la ong ba ka jingbuh ktem jong ki shipai BSF ha Iew Amlarem ka la pyndik ïa ki paidbah jong ki shnong khappud bad kynnoh ruh ba ki shipai BSF ki pyrkhing tang ïa ki nongshong shnong ka ri India katba ïa ki khar Bangladesh kiba wan kiew beain sha ri India ha ka sngi long iew ha Dawki kim ju nud ban leh eiei ruh em.
U la ong ruh ba ka long kaba sngewsih ba ki paidbah kiba sah ha khappud ki hap ban da ïoh jingthoh na u Commandant jong ki shipai BSF haba ki mih na shnong ban leit iew sha Jowai bad sha Dawki bad lada ki ïaleh pyrshah ki shipai BSF ki kurup noh ïa ki mar ki mata da kaba kheiñ ba ki dei ki mar be-aiñ bad rah beit sha ka ktem sah jong ki shipai.
“Ki paidbah na War Jaiñtia kiba leit thied ïa ki marbam mardih sha iew na ka bynta ki jingdonkam ba mamla ka sngi ki shah pyndik bad shah pynsangeh shiteng lynti ha ki shipai BSF. Nalor kata, ki shipai BSF ki pan sa ki Cash Memo jong ki mar ba la thied bad kaba kham sngewsih ka long ba ki shipai kip hah pynhap wat ïa ki mar nalor ka kali tang ban talasi bad kane ka pynsuhsat bad ka pynbitar haduh katta katta ïa ki paidbah kiba hap mad ïa kine ki jingshah pyndik da ki kynta ha shiteng surok,” ong une u nongïalam ka seng.
“Nalor kata, ka jaka kaba ki shipai BSF ki talasi ïa ki kali kam dei satia ha khappud bad ka long kaei kaei kaba sngewsih ba ka kamram jong ki shipai BSF kiba dei ban ap pahara ha khappud ki talasa pynban ïa ki kali ha ki surok bad ha ki shnong kiba jngai na ki shnong khappud. Ka jingdon jong kine ki shipai ka la pynwit haduh katta katta ïa ki paidbah bad ka la wanrah jingeh ruh ïa ki paidbah nongshong shnong jong ka Riwar Jaiñtia,” la bynrap une u nongïalam ka seng.