Shillong, Ïaïong 27 : Ka Riwar Mihngi Development Council (RMDC) ha ka sngi Palei ka la dawa ïa ka Sorkar Jylla ban pynsted ïa ka jingïarap da ka song pisa sha ka Longïing jong ki arngut ki lanot kiba la khlad noh na ka jingtwa khyndew ha surok Rngaiñ, kaba don ha lynti na Shillong sha Dawki kaba la jia ha ka janmiet jong ka 14 tarik Ïaïong.
U President ka RMDC Bah Sinophil B Tariang bad General Secretary Dmuising Khongjirem ha kane ka sngi ki la leit ban ïakynduh ïa u Sub Divisional Officer (Civil) ka Pynursla ban aiti ïa kane ka jingdawa.
Lah ban kdew hangne ba ki arngut kiba la khlad na ka jingshah ban ha ka twa ki dei u Bah Krejunelang Khongjirem bad u Bah Serborlang Jaktung.
Kine ki long ïing wat hadien artaiew ba la jia kane ka jingjia ba sngewsih, hynrei haduh mynta kim pat shym la ïoh kano kano ka jingïarap na ka liang ki bor sorkar bad kane ka jingjia kala buh ia ki ha ki jingeh namar ba kiba khlad kidei ki ba bsa ïa ka ïing ka sem.
