Sngewnguh ki nongshetja skul ïa ka sorkar Jylla halor ka jingkyntiew ïa ka jingaisngewbha
Jowai, Ïaïong 27: Ka All Jaiñtia Mid Day Meal Workers Union (AJMDMWU) seng kmie ha ka jingïalam u President samla Jerry A Suting ha ryngkat ka jingsynran lang ka kong Jena Nengnong President Cook Cum Helper na East Khasi District, Samla Charles Shongwan General Secretary na Ri-Bhoi District lem bad kiwei ki nongïalam, ha ka 26/04/2023 kila leit ban ïa kynduh ïa u Bah Rakkam A Marak Myntri ba dei peit ïa ka tnat pule ka sorkar jylla ha ka jingdonlang ryngkat u MLA Rambrai.
Ha kane ka jingïakynduh ka seng la pynsngew na ka bynta ki hajar ngut ki nongshetja ha ki skul ha ka jylla da kaba ai ruh ka jingsngewnguh ïa ka sorkar Jylla halor ka jingpynkiew ïa ka pisa ne ka jingaisngewbha (honorarium) kaba ju ai T.100 shibnai naduh 20 snem tam mynshwa bad mynta u snem la pynkiew sha ka T.1100 shibnai na ka bhah ka sorkar Jylla bad kaba dei ban treikam naduh u bnai April 2022.
Kumba ka long ka jingsiew ïa ki nongshetja ka la long ?2000 shi bnai na ka bynta tang shiphew bnai (?900 na ka bhah ka sorkar kmie bad ?1100 shi bnai na ka sorkar jylla). Kumjuh ka Seng ka ai ka jingsngewnguh ruh halor ka jingsdang ka sorkar ban pynpoi ïa ka jingaisngewbha man u bnai lyngba ki Bank Account jong palat khadphra hajar ngut ki Cook cum Helper PM POSHAN ha jylla bad ka kyrpad ïa ka sorkar ban pyllait kloi ïa ka pisa kaba ka la kular ban siew naduh u bnai April ’22.
Ka seng kaba la ïalam khmat ban ïakhih ha ka jylla haduh ba ka sorkar jylla ka la pdiang ban pynkiew ïa ka pisa jingaisngewbha sha baroh ki Cook cum Helper, kala ban jur ïa u Myntri ban ai noh da ki tyndong lyer (LPG), ka Um sorkar ban ïoh ban shet ha ki kamra shetja ha ki skul, khnang ba ki nongshetja kin ïoh ïa ka met kaba koit bakhlaiñ bad khamtam ba ki dieng kin dang bun ha ka Meirymew.
Nalor katei, ka seng kala kyrpad jur ruh ïa u Myntri ban ïa kren lem bad ka Sorkar India ba kan ïarap ban pynkiew noh ïa ka jingaisngewbha na ka bhah jong ka sorkar kmie sha baroh ki nongshetja skul ha ka Thaiñ shatei lammihngi khamtam ïa ka jylla Meghalaya kaba la mad ïa ka jingremdor jong ki mar bam ha iew ha hat bad khamtam ha ka pule ka dangle bad kumjuh ïa ka shuti ïa ki nongshetja haba ki pang ki shitom khamtam ïa ki Longkmie ki Kynthei.