Khliehriat, ïaïong 27 : Ki sim pukni ba ju tip kum ki Himalayan Vulture kiba la wan poi ha shnong Demthring, West Jaiñtia Hills District, mynta ki la don kiba wan poi sa sha shnong Wapungshnong, East Jaiñtia Hills District, ki nongtrei jong ka tnat Wildlife ki la shim khia ban ap pahara ïa kine ki sim ha katei ka khlaw kaba don ha Wapungshnong ban khanglad ïa ki briew ba kin tur shajan ki sim.
Ha kaba ïakren bad u bah Shanbor Paul Lamare, uba dei u officer Forester-1 jong ka Ratacherra Beat, u la ïathuh ba ki la iohjingtip naduh ka 25 tarik ba ki la don kine ki sim pukni (vulture) kiba la wan poi shane sha Wapung, kumta ka kynhun jong ka tnat Wildlife hynnin ka sngi hi ka hiar sha katei ka jaka ba don ki sim, ynda ki la poi ha katei ka jaka ki la lap ba ka don kawei ka masi kaba la ïap ha khlaw bad kine ki sim ki la ïa muja ka bam doh pyut “Shuh shuh ngi la ïoh jingtip ba ki la poi ha shnong Tuber ruh, hangtei ha Tuber ngi lap ba ka don ka miaw kaba ïap” ong u bah Lamare..
Ki nongtrei jong ka tnat Wildlife, kim shah ïa ki briew ba kin tur than hajan bad ym shah ruh ba kin ai jingbam ïa kine ki sim, ki la shim khia ban pahara ïa kine ki sim namar kine ki dei kita ki Himalayan Vulture kiba la jan duh jait, ka jingbym shah ban tur shajan ka dei ruh ban ïada ïa ki briew na ki jingpang namar ba kine ki sim ki bam ïa ki kynja ba pyut te ïoh lehse ïoh kan ktah ïa ka koit ka khiah jong ki briew, u bah S.P.Lamare u kyntu ïa ki paidbah ba kim dei ban tur than hajan kine ki sim.
Ha kane ka kynhun jong ka tnat Wildlife, la ïa don lang ruh u bah Moris Sapuh, uba dei u Forester-1 jong ka Sonapur Beat lem bad ki nongtrei ka tnat Wildlife kaba na Jowai, Sonapur bad Ratacherra.
