Ym don kiba ïap na ka jingpang Khieshohrih ha ki 5 snem ba la leit ha Ri-Bhoi : DMO

Nongpoh, Ïaiong 27: Ka District Malaria Officer, ka Ri-Bhoi District ka Dr E Kalwing haka jingrakhe ïaka World Malaria Day kala pyntip ba ha kine ki 5 snem bala leit ym don ba ïap satia na katei ka jingpang ha Ri-Bhoi District watla katei ka jingpang ka dei kaba ma bad kaba la don naduh ki spah snem ba mynshuwa.
Kala ong ruh ba haduh kine ki sngi ba mynta katei ka jingpang ka dang dei kawei naki jait jingpang kaba ma bad kala pyntip ruh ba naka liang ka sorkar kala buh thong ban pynduhjait ïa katei ka jait jingpang shuwa u snem 2030 bad ka Ri-Bhoi District kala don ha lynti ban pynduhjait ïa katei ka jait jingpang, bad kane baroh ka dei namar ka sorkar ka buh ïaka thong lyngba ki nongtrei bad nongpeit nongkhmih (Surveillance worker), ki ASHA bad pynjur ruh ka jingsynreit dawai ban pynïap ïaki khñiang bad ki kaiñ pyrjong ha kito ki jaka ba suba ba katei ka jingpang ka dang im.
Kala ong ruh ban aka liang ka sorkar ka ju pynlong ruh ïaki prokram ai jinghikai ïaki paidbah kumno ban sumar bad ban lehkhuid ban ïada na katei ka jait jingpang khamtam ban nym ailad ïaki kaiñ pyrjong ba kin ioh ban kha pylleng.
Ïa katei ka jingrakhe ïaka World Malaria Day la pynlong da ka District Malaria Officer, ha Science Hall Nongpoh haka 25 tarik mynta u bnai halor ka phang “Time to Deliver Zero Malaria: Invest, Innovate, Implement” bala wan ruh ban pynshit pynshngaiñ da ka jingdon lang jong u Bah T.Marwein EAC, Dr P.Kharnarry DM&HO ka Ri-Bhoi, Dr. D.Momin Block Medical Officer Umling Block, Dr E.Kalwing District Malaria Officer, ki ASHA, ki khynnah skul bad kiwei kiwei ki ophisar sorkar.
U Bah T Marweiñ EAC ka Ri-Bhoi District haba kren ha katei ka sngi u la ong baka jingpang Khieshohrih ka dei kawei naki jait jingpang kaba ma kaba lah ruh ban ïabit na uwei u briew sha uwei pat bad donkam ka jingsumar kaba biang ban ïada naka jingjur bad lam ruh sha ka jingïap.
U la kyntu ruh ha katei ka sngi ba kum ki paidbah ki dei ban nang ban leh khuid, ban pynkhuid ïaki rud ki kiar ïing bad ban weng ïaki tiar ki tar kiba lah ban long kum ki jaka kha pylleng jong ki kaiñ pyrjong, khnang ba ka tnad ka koit ka khiah kan lah ban weng noh ïa katei ka jait jingpang.
Ha katei ka snigi la ioh ruh ban sam ïaki khusnam sha ki ASHA kiba lah ban trei bha ïaka kam naka bynta u snem 2022 bad kumjuh ruh ki Best Surveillance Worker 2022 jong ki Dispensaries, PHCs, CHCs.