Shim ïa ka jingpule hakhmat kum ka atiar ban long ki nongïada ïa ka ri bad Jaidbynriew : HITO

Nongpoh, ïaiong 27: Ka Seng Hynniewtrep Integrated Territorial Organisation (HITO) Ri-Bhoi District mynta ka sngi kala leit ban rung sha ki shlem ai jinghikai bad ki skul pule haka thaiñ Ri-Bhoi District ban ai mynsiem ïaki samla pule ba kin trei shitom haki jingpule jong ki, ban long ki khynnah kiba don akor kiba tip briew tip blei bad minot thop ban rah ïaka burom jong ki kmie ki kpa kiba la trei shitom ban mih syep mih syar ban kyrshan ïala ki jong ki khun khamtam ba kin shim ïaka jingpule kum ka waitlam bad ka stieh ban ïada ïaka ri bad ka jaitbynriew.
Naka liang ka seng hapoh ka jingïalam jong u Bah Ban Kharnaior kum u President haka jingdon lang ki dkhot ka Ri-Bhoi naduh u Bah Kenny Nongrum, Apbor Nongrum, Elvis Kyrsian, Moonshai Maring bad kiwei kiwei kila ioh rung ban rung sha ki skul ba kynthup ïaka St. Francis Umbir, MeECL Secondary School Umiam, Mynken Higher Secondary School bad kiwei kiwei ban ïakynduh kyrpang ïaki khynnah pule jong kitei ki skul naka bynta ban ïa mir jingmut ha kaba ïadei bad ki jingpule jong ki ban long ki samla pule kiba don ka jingthrang bad ka jingangnud ban poi sha ka thong haka jingim jong ki.
Naka liang ki nonghikai jong kitei ki skul kila pynpaw ka jingsngewkmen kaba khraw hadien ba ki nongïalam ka seng HITO ki don ka jingangnud bad ka jingthmu kaba bha naka bynta ka lawei ki samla pule, ym ban ngop haki jingmlien bad ki jingdih ba sniew lane ban pep skul tang shiteng por, hynrei ban shim ïaka jingpule kum ka waitlam bad ka atiar haka jingim jong ki khamtam ban ïada ïaka jaitbynriew jong ngi.
Haba kren sha ki lad pathai khubor naka liang u Bah Ban Kharnaior u la ong ba ka daw bala pynlong ïaki nongïalam ka seng ban leit rung sha ki jaka pule ha Ri-Bhoi ka long ban ai mynsiem ïaki samla pule ba kin mih shakhmat ban minot bad ïakhun doh ïap bad kum ka seng ka don ruh ka jingangnud ba ki samla pule khasi kin mih shakhmat ban ïakhun ïaki eksam kiba heh kum ki IAS, IPS, IFS bad kiwei kiwei namar kumba long mynta ka jylla jong ngi la synshar da ki bar jylla naduh ki post kiba heh, bad duna eh ki khasi kiba dang pass ïa kitei ki exam.
“Ngi donkam da ki briew lajong ban synshar ïaka jylla ban pynim bad ïada ïaka jaitbynriew dei nakata ka daw ngi leit ban pynshlur ïaki samla pule ba ki dei ban minot bha haki jingpule jong ki ban kiew shaphrang ka jaitbynriew ha baroh ki liang, khnang ba kitei ki samla kiba dang khie dang san kin long ki atiar nongïada ïaka jaitbynriew lashai lashisngi” ong u Bah Ba.
U la ong ruh ba baroh ki samla kim lah ban long IAS, IPS, hynrei ngi donkam uwei ar ngut ban mih na ka jylla naka bynta katei ka kam ban ioh bat ïa u lakam synshar haka jylla, naka bynta ka jingkyrmen jong ka jaitbynriew da kaba kyntu ruh ïaki samla pule ba kim dei ban im ka jingim kaba lyngkar, hynrei ban im tipsngi ban minot thop haka jingpule, ban pynsngewbha ïaki nonghikai bad ki kmie ki kpa lyngba ka jingtrei shitom jong ki khnang ba kin long ki samla pule kiba don ka jingkyrmen bad poi shaka thong haka jingim jong ki kumba ki angnud, u la bynrap.