Nongpoh, Ïaiong 27: Ka Meghalaya State Pollution Control Board (MSPCB), jong ka tnad Forest bad Environment Department jong ka sorkar Meghalaya mynta ka sngi kala pynlong da ka Capacity Building Workshop halor ka National Clean Air Programme kumno ban tehlakam ïaka lyer jaboh bad ban ioh ïaka lyer khuid namar ka lyer khuid ka long kaba kongsan naka bynta ki briew ban ring mynsiem haka jingïalang bala long ha CTI, Byrnihat.
Ha katei ka prokram la wan ruh ban shim bynta da u Syed Md. Razi Commissioner and Secretary ka tnad Forest and Environement Department jong ka sorkar jylla, haka jingdonlang u Dr. Manjunatha C Chairman ka MSPCB, R Nainamalai Member Secretary, Bah MB Tongper ADC ka Ri-Bhoi District bad kiwei kiwei ki ophisar naki tnad sorkar bapher bapher.
U Dr. Manjunatha C Chairman ka MSPCB haba kren ha katei ka sngi u la ong ba ka thong jong katei ka prokram ka long ban pynduna ïaka lyer jaboh khamtam haki jaka ba bun ki karkhana kum ka thaiñ Byrnihat ban ioh ïaka lyer khuid, kumba ka thaiñ Byrnihat ka dei kawei naki thaiñ kaba jur ka lyer jaboh kaba don ruh kala kyrdan kaba hapoh eh.
U la ong ruh ba naka liang ka sorkar kala pynkhreh ïaki buit kumno ban pynduna ïaka lyer jaboh shuwa u snem 2025 khamtam haka thaiñ Byrnihat kaba pynmih bun ki tdem naki karkhana, ban ban ai jinghikai ruh sha ki karkhana, ki paidbah naka bynta ban ioh ïaka lyer khuid.
