Nongpoh, Rymphang 04: Ki pulit ka Ri-Bhoi ryngkat bad CRPF kiba la pynkhlaiñ bha ka jingpahara shuwa ka elekshon Lok Sabha, haka 3 tarik sngi u Blei kila ioh ban bat ïa kawei ka trok ha Lad Umsaw ha Ri-Bhoi ryngkat u kynja kumba 280 song haka jingkhia kumba 4746.409 kilo bad u ba la antad ka jingshong dor kumba 20 klur eiei.
Kumba la pyntip da u heh pulit ka Ri-Bhoi u Jagpal Singh Dhanoa u la pyntip hadien ka jingtip kaba bñiah halor ka jingdon kawei ka trok kaba kit ïaki jingdih buaid, ki pulit ka Ri-Bhoi kila pynlong ka jingpynap shrip ha lad Umsaw, bad ioh bat ïa kawei ka trok kaba don ïa u number NL 01 AH 5853 bad hadien ka jingtalasi la lap ïa kumba 280 tylli ki song kynja (Marijuana) bala song bha haki plastic bala kit ha katei ka trok.
Hadien ka jingtohkit ki pulit la lap ba u dei u kynja (Marijuana) bad don ka jingkhia kumba 4746.409 kilo bad halor katei ka jingioh kurup ki pulit kila kem ruh uwei u briew bala tip kyrteng kum u Babulal Sheikh (48) na Maharashtra bad haka jingtalasi ïa utei u briew ki pulit kila kurup ruh ka pisa kumba T.3760/- ryngkat kawei ka mobile phone Nokia.
Hadien ba la dep ban tohkit bñiah halor ka jingioh kurup ïa utei u drok, na ka liang ki bor pulit ka Ri Bhoi ki la dep ban register case ha Umiam Police Station katkum ka NDPS Act bad ka jingtohkit ka dang ïaid shakhmat ban lap shuh shuh ïa kiba donkti ha katei ka kam.
