Nongstoiñ, Lber 04 : Ka Hynñiewtrep Youth Council West Khasi Hills bad ka Mawshynrut Youth Movement (MYM), ha ka sngi nyngkong, ki la leit ban pynsangeh ïa ka interview thep kam ba la pynlong da ka tnad Social Welfare ka West Khasi Hills.
Kine ki kam ba lait ïa kaba la pynlong interview thep kam ki kynthup ïa ka kam District Mission Coordinator, Gender Specialist, Specialist in Financial Literacy, Accountant Assistant, Data Entry Operator bad Multi Tasking Staff.
Hynrei, ki nongïalam jong ki ar seng hapoh ka jingïalam u samla Lumlang Kharsyiemlieh, President ka HYC bad samla Shembor Rynñiaw jong ka MYM, ki la phah pynsangeh ïa kane ka interview thep kam, namar ba ka tnad Social Welfare ka la khot interview tang ïa ki samla ba la thep kyrteng hapoh ka Ophis jong ka Employment Exchange.
Kine ki nongïalam ki la pyntip ba ki la leit ban dawa ïa ka Ophisar ka tnad Social Welfare Kong Pakynteiñ ba kan pynsangeh ïa ka interview. Hynrei la kynnoh ba kane ka Ophisar ka la pyneh da kaba ai daw ba ka la ïoh ïa ka hukum na ki bor khmih ba hap ban pynlong beit.
Kumta, kine ki Seng k ila leit ïakynduh ïa u Deputy Commissioner ka West Khasi Hills ban dawa pynsangeh ïa ka interview bad dawa ruh ba dei ban da pynmih da ka jingpynbna laitkam (Advertisement) kumba ju leh ha ka rukom thung kam.
Ki ar Seng ki la hiar sha ka ophis ka tnad Social Welfare ban pynsangeh ïa kane ka interview, hynrei la shem ba u Deputy Commissioner u la shimkhia ïa ka jingdawa bad u la hukum dalade ban pynsangeh shuwa ïa kane ka kam.
U samla Lumlang Kharsyiemlieh u la ong ba ka seng ka sngewnguh ïa u DC u ba la sngap ïa ka jingkyrpad jong ki ar seng kiba la ieng na ka bynta ka bha ka miat jong ki samla wad kam.
