Ha ïaw Musiang bad Ladthalabuh, tuid ki paidbah sha ka jingïalap elekshon MP ka VPP

Jowai, Lber 04: Ka Voice of the People Party (VPP) sa shisien pat ka la hiar sha ka ktem jong ka NPP ha West Jaiñtia Hills na ka bynta ban ïalap elekshon sha ka Dorbar Lok Sabha, da kaba pynlong ïa ka jingïalang ha nyngkong ha Ïaw Musiang bad hadien pat ha Ladthalaboh.
Ha kine ki artylli ki jingïalang, ha kaba la kren da u Bah Ardent Basaïawmoit, President ka Seng bad u Dr. Ricky AJ Syngkon, uba long u Kyrtong MP bad u General Secretary ka Seng, wat lada ka VPP kam shym la don tnad trei ha kane Jowai Constituency ha kane ka elekhon MLA baladep, hynrei la ïohi ba ki paidbah ki la ïatuid ban sngap ïa ki jingkren bad kumjuh ruh ban pynpaw ka jingkyrshan ïa kane ka Party kaba dang dap tang arsnem tam.
Ha ka jingïalang kaba la long ha ïaw Musiang ha ka jaka ba don mar syndah bad ka Jaiñtia Hills Autonomous District Council (JHADC) u Bah Ardent u la khyrwit nyngkong ïa ka jinglehbeiñ ka Executive Committee(EC) ba la ïalam da ka NPP bad ïatreilang bad ka UDP bad kiwei de ki Seng, namar ba la jan shi snem ki nongtrei bapli kim shym la ïoh tulop.
“Aiu ki Party ba pynlong ïa ka EC ha JHADC ki leh haduh ba ki nongtrei jong ka Council kim shym la ïoh tulop satia?”, la ong u Bah Ardent, hapdeng ka jingrisa bad thap kti ki paidbah. La ïohi ruh ba ki nongtrei ka JHADC kiba la ïeng na ki jingkhang ïit bad kiew sha jrong tnum ka ophis treikam jong ki.
U Bah Ardent u la ong ba dei namar kane ka daw ba ka VPP ka la mih ban kren na ka bynta kiba shah lehbeiñ kiba shah leh shiliang, kiba tieng kiba smiej ïa ki nongmihkhmat jong ki. U la ong ba ha ka jingshisha ki MDC, ki MLA kidei tang ki shakri jong ki paidbah bad ki paidbah kidei ki nongaikam ïa ki. Ha ka jingshisha kum u trai ka kam, haba u shakri ne u nongbylla um trei bha,la ju bujli noh da kiwei. “Lada ki MDC bad MLA jong phi kim trei bha, dei ban jied bujli noh da kiwei”, la ong u nongïalam ka VPP.
U la ai mynsiem ïa ki paidbah ba kim dei ban tieng ïa ki MLA ne ki MDC jong ki, namar ba ka VPP kan ïeng ha syndah jong ki. Namar kata ka daw u kyntu ïa ki ba kin ai noh ka jingkyrshan ïa ka VPP ha kane ka elekshon MP kan ban sa long shen bad kumjuh ha ka elekshon MDC.
“Ngin ïakhun ban thaw ïa ka record da ka jingshem phang u paidbah ban pynjop ïa ka VPP ha kane ka elekshon MP bad ngin ym shah shuh ïano ïano ban ïalam bakla nangne shakhmat ïa ka synshar ka khaddar” , la ong u MLA ka Nongkrem.
U President ka VPP u la kynthah ruh ïa u MLA ka Jowai, uba la ong ha kine ki sngi baladep ba ki MLA VPP kim ju kren eiei ha Assembly, hynrei ki nang tang ban mih sha surok. “Nga da lyngngoh kumno phi ïajied MLA kum ïa une u rangbah, uba kren pynban kum u khunlung, katto ngi kren ha Assembly ha ka dorbar ba dang shu dep kumno um ïohi. Kadei tang ka jingkren khunlung”, u la ong.
Ula pynsngew ba ki don ki MLA kiba kynthoh ïa ka VPP kiba kren shano yn jop u Prah khlem don ki nongtrei, hynrei u ong mynta u paidbah ula tip lut ïala ka jong ka hok da kaba pynjop don burom ïa u Prah. Ka jingjop u Prah ha kane ka Election MP, MDC bad MLA ban wan yn pynkhuid ïa kane ka ri ba ieit da ka jingleh shilliang khmat, ha kaba wat lada ki don ki samla kiba la thep tender da ka lynti kaba khuid bad ïoh ruh ïa ka tender, hynrei ki la shah pynbor ban ai noh shawei. “Ka VPP kan nym ailad da lei lei ba kin jia kiba kum kine ïa ki khun samla jong ngi”, la byrthen u hehduh ka VPP.
Ha ka jingïalang kaba la long ha Ladthalaboh lei, la ïohi ba ki paidbah ki la mih da ki hajar ngut wat lada ka jingïalang ka long ha ka por mynmiet. Ki paidbah ym tang ba ki la ïamih ban sngap ïa ki jingpynshai na ka liang ki nongïalam ka Seng, hynrei kiba bun ruh ki la wan shakhmat ban pynïasoh sha ka Seng, ha kaba u bah Ardent ha ka jingkren jong u la ong, “Lada U Blei U don ha ka liang jong ngi, yn nym don bal ah ban ïaleh pyrshah ïa ngi”.