Shen yn rai ka Kynhun Myntri ban sdang ïa ka Science bad Commerce ha Sohra, Baghmara bad Williamnagar College

Baghmara, Lber 4 : Ban kyntiew ïa ka kyrdan jingpule sha ki jaka ba shabar ki Sor Shillong bad Tura , u Myntri Rangbah ka Jylla u Conrad K Sangma ula pynbna ba shen ka Kynhun Myntri kan sa shim ïa ka rai ban sdang noh ïa ka tnad pule Commerce bad Science ha ki College ka Sorkar ha Sohra, Williamnagar bad Baghmara.
U Myntri Rangbah ula pynbna ïa kane ha ka jingïalang plie ïa ka ïing College bad ki Hostel ki Kynthei bad Shynrang ba thymmai jong ka Captain Williamson Government College kaba don ha Baghmara mynta ka Lah Sngi U Blei.
“ïa ka rai ban sdang noh ïa ka tnad pule Commerce bad Science ha ki lai tylli ki College Sorkar yn sa ai jingmynjur shen da ka kynhun Myntri” pynbna u Myntri Rangbah hakhmat ki paidbah ha Baghmara.
Mynta, namar ka jingbym don ka tnad pule science bad commerce ha kine ki college Sorkar, da ki hajar ngut ki samla kynthei bad shynrang na ki jaka nongkyndong kila hap ban wan sha Tura ban rung klas ha ka Tura Govt College bad Don Bosco College.
Namar kane, kila hap ban pynlut bun bha namar ka jinghap sah ha ki hostel shimet lane shong wai. Kiba bun ki samla pule na ki longïing ba duk, wat hapdeng ka jinglah jong ki ban pule ha ka science bad commerce, kim banse ban kynran dien noh ha ki jaka nongkyndong.
Ban pynkut ïa kane ka jingeh, u Conrad ula ong ba ka Sorkar ka don jingangnud ban kyntiew ïa ka jingpule science bad commerce haba buh hakhmat ïa ka jingnep jabieng jong ki samla ka Jylla.
“Ngi la ïohi dalade ïa ka jingangnud bad jingthrang jong ki samla ban pule ïa ka science bad mathematics. Ha kiba bun ki jingïakop lehkai chess kaba donkam ban kheiñ jingkheiñ, ngi la shem ba ki samla jong ngi kila paw bha shakhmat. Khlem ka sap bad ka jinghikai kumno yn lah ban long satang lada don ka jingnang jingtip ïa ka science bad ka mathematic hapdeng ki samla. Ngi donkam ban shu ai ka kabu ïa ki” ong u Myntri Rangbah.
Lada ki kam ki jam ki ïaid beit, ka Sorkar ka angnud ban sdang noh ïa ka tnad science bad commerce ha Williamnagar, Baghmara bad Sohra ha une u snem pule ba mynta u ban sdang naduh u Jymmang bad Jylliew.