Shillong, Lber 08 : Ka Meghalaya ka don kumba 1700 tylli ki shnong ki bym pat poi surok bad halor kane ka sorkar jylla ka buh thong shwa usnem 2032 kan pynïasoh lut ïa ki da ki lynti syngkien.
Kumba mar shiteng na kine ki shnong yn sa pynrung noh ha ka kylla kaba bud jong ka PMGSY katba kiwei pat yn sa pynïasoh lyngba ka Chief Minister’s Rural Connectivity Program, ong u Myntri Rangbah ka Jylla, Conrad K Sangma ha ka jingkren halor ka Mangtyngka.
“Ha ka snem mangtyngka kaban wan, ngin pynïasoh ïa kumba 100 tylli ki shnong bad shna ruh ïa ki 100 tylli ki jingkieng ïaid kjat ha kylleng ki bynta jong ka jylla,” u la ong.
U Myntri Rangbah u la mang ruh 2,873 klur tyngka, kaba long ka mangtyngka kyllum na bynta ka tnad Public Works Department bad na kane 2,122 klur kadei lyngba ka pla tyngka jong ka sorkar jylla, kaba ka jingkiew ka la kot sha ka 15.6 persen na ka jingmang mynta u snem.
Nangta u ong ruh ba ha ka jingkren bad ki paidbah lyngba ka CM Connect Programme, ki surok shnong ki dei kiba hakhmat eh ba ki paidbah ki ud man ka por.
“Ban weng ïa kine ki jingeh, ngin sa siang rong ïa ki surok rim ha ki nongkyndong lyngba ka Chief Minister’s Rural Connectivity Program. Nga buh thong ruh ban pynbha ia ki 200 km kiba kum kine ki surok ha ka snem mangtyngka kaban wan da kaba pynïasoh lang bad ka MGNREGS bad kiwei ki skim. Nga la mang 60 klur tyngka na bynta kane ka sienjam,” u la bynrap biang.
Shuh shuh u la ïathuh ruh ba ha kine ki 7snem ba la dep, ka sorkar ka la dep ban mang jan kot 4,000 klur tyngka na bynta ki projek shna surok kynthup ïa ka 1,000 klur na bynta kane ka snem.
“Ka la don ka jingkiew stet lada nujor bad ka 659 klur tyngka na bynta ki surok kaba la mang naduh u snem 1991 haduh u snem 2018, kata ha ki lai phew snem shwa ka sorkar jongngi,” u la ong. Da kaba bynrap ba ka la don ka jingkiew stet ha ka kam hynrei na ka liang u Myntri Rangbah u la pynpaw ba ki dang don bun ki kam kiba hap ban leh da kaba buh hakhmat ïa ki jaka kiba jynjar ban poi.
U Myntri Rangbah u la ïathuh ruh ba tang ki 12 tylli ki projek surok jong ka NHIDCL kiba dang ïaid shakhmat mynta ki la kot palat 5,000 klur tyngka.
“Nga sngewkmen ban pyntip ba ka jingpyntrei ïa ki lai tylli ki package jong ka 38km Shillong Western Bypass kaba shongdor 1800 klur ka kam ka la ïaid mynta.”
Nalor kine, u Myntri Rangbah u ong ruh ba ka sorkar jylla ka sdang ruh ïa ki projek surok lyngba ka Meghalaya Integrated Transport Project (MITP), da ka jingkyrshan na ka World Bank ha kaba ki kam bun ki la jan dep artad.
