Ka bhah mang tyngka ka la kiew bha na ka bynta ban kyntiew ïa ki longkmie, ïathuh ka kong Ampareen

Shillong, Lber 08: Ka Myntri kaba khmih ïa ka tnat ka Koit ka Khiah ka kong Ampareen Lyngdoh ka la ong ba kane ka mang tyngka kaba mynta la ïohi ba ka la kiew haduh 60% percent plus ka jingpynleit jingmut na ka bynta ki longkmie bad ka roi ka san jong ki.
Haba kren ha ka sngi rakhe ïa ka sngi burom ka international women’s day ha Shillong, ka kong Lyngdoh ka la ong ba kane ka pyni ba ka sorkar ka la shim khia na ka bynta ka bha ka miat jong ki longkmie ha ka jylla.
“Nga sngewkmen ban ïohi ba ki longkmie ha kane ka juk kaba mynta ki la kiew ha ka ïoh ka kot, nga la kynduh ïa ki longkmie napoh ka Jaiñtia Hills kiba la mad ka jingeh na ka daw jong ka jingshah khang tih dewïong ha ka NGT ha kaba kane ka la ktah shibun bha ïa ki,” ong ka kong Lyngdoh.
Na ka liang ka kong Lyngdoh ka la ong ba ha kane ka por kaba mynta ki longkmie ki la wanlang ban wanrah ka jingkylla ha ka imlang sahlang bad ki la shim da kawei pat ka sienjam ban kamai na ka bynta ban kyntiew ïa ka imlang sahlang ha kane ka por kaba mynta.
Ka la ong ruh ba ki nongtrei ASHA bad ki Aganwadi kiba dei ki longkmie ki la long u budlum ban kyntiew ïa ka imlang sahlang. “Nga kwah ban ai khublei ïa baroh ki nongtrei ASHA ïa ka kam kaba ki la trei ha kaba ki la leit jngoh manla ka sngi ïa ki ïing ki sem bad ki la ïarap ruh ban sumar ïa ki longkmie kiba armet bad ki khynnah,” ka la ong.
Ha kaba ïadei bad kane na ka liang jong ka kong Lyngdoh ka la pyntip ruh ba ha ki shnong ki thaw bad ki jaka sor ki longkmie ki la bat ruh ïa ka kam Secretary jong ki VEC na ka bynta ban wanrah ïa ka jingkiew ha ka ïoh ka kot jong ka jylla.
“Mynta ngi lah ban ong ba ki longkmie ha ka jylla kin lah ban kyntiew ïa ka ïoh ka kot jong ka Meghalaya sha ka 10 billion economy ha kaba kane kan sa kyntiew ïa ka jylla ha ka ïoh ka kot ha ka snem 2032,” ka la bynrap.
Haba ong ba ka long kaba donkam na ka bynta ka jingdonkam ban don ka bhah ïa ki longkmie ha ka saiñ hima sima na ka liang ka kong Lyngdoh ka la ong, “Nga ngeit skhem ba ha u snem 2028, lada ka wan bhah jong ki longkmie, ngin sa ïoh ïa ki longkmie kiba lah ban ïalam ïa ka jylla katkum ka hok jong ki.”
Na ka liang jong ka Myntri ka la pynpaw ba ka donkam ka jingïatreilang ban kyntiew ïa ka bha ka miat jong ki longkmie ha ka jylla. “Ngi donkam ban tei ïa kane naba tang ka sorkar kam lah ban leh eiei ha kaba ïadei bad kane ka ka kam ngi donkam ïa ka jingtreilang jong ki shnong ki thaw,” ka la bynrap.
Ka kong Lyngdoh ka la pyntip ruh ba ka sorkar ka la wanrah bun ki jingtreikam na ka bynta ban ïarap ïa ki longkmie ha ka jylla.
Ka la bynrap ruh ba ka sorkar ka la wanrah ïa ka Safe Motherhood Scheme, Mother Apps bad ka Janani Shishu Suraksha Karkaram Program kaba dei ruh jong ka sorkar pdeng ban ïarap ïa kiba bun ki longkmie khamtam eh ha kaba ïadei bad ki jingeh ba ki mad ha ki por armet.