Nongpoh, Nohprah 22: U Bah Prestone Tynsong Symbud Myntri Rangbah ka jylla u ba la hiar hynnin ka sngi sha ka thaiñ Umden ha Ri-Bhoi ban shim bynta haka tamasa Ri Kunai La Tynrai bala pynlong da ka NEFA ban pynneh pynsah ïa la ka tynrai, u la kular hakhmat ki paidbah ban pynlong ïaka Umden kum kawei naki jaka pdeng bad khamtam ban pynurlong noh ïaka surok kaba ki paidbah kila ap khmih lynti la slem namar ka jingshem jingeh haka leit ka wan.
Haba kren ha katei ka jingïalang, u Bah Prestone Tynsong u la ong ba hadien ka jingïakren sani bad u MLA ka thaiñ u Bah Mayral Born Syiem bad kumjuh ruh ka jingai dorkhas jong ka Synjuk ki Rangbah Shnong ka Raid Nongtluh halor ka jingeh jong ki paidbah haka leit ka wan lyngba u surok Nongpoh-Umden-Sonapur (NUS), u la ïohi ba ka thaiñ Umden ka long kum ka Dabor bad ka jaka pdeng namar na Mawhati-Umtrai ka don ka surok ban mih sha Umden ban pynjan ïaki paidbah, na Nongpoh sha Umden ka don kumba 20 km kaba dei ka surok kaba la sniew ba ki paidbah kila ap khmih lynti bad, na Umden sha Marmaiñ kumba 11 km bad kumjuh ruh na Marmaiñ sha Byrnihat ka don kumba 30km bad lada lah ban pynïasoh ïa kine ki surok ka Umden kan long kum ka dabor bad ka jaka ba pdeng.
“Nga la ïohi ïaka jinglong jingman jong u surok bad ka dei shisha ka surok kaba donkam naka bynta ki phew tylli ki shnong ha katei ka thaiñ, bad naka liang ka sorkar bad kumjuh ka tnad PWD nga kular ba ka Umden kan long ka jaka pdeng, bad nga kwah ba kane kan long bad kan jia lyngba ka surok kaba bit kaba biang” u la bynrap.
