Shillong, Nohprah, 22: Ka tnat Transports jong ka Sorkar Jylla ka la pynim biang ïa ka post Assistant General Manager (AGM) hapoh ka ophis Meghalaya Transport Corporation (MTC) ïa kaba ladep ban pynduh naduh ki snem 2016 eiei.
Ïa kane la pyntip da u Bah Disparsing Rani uba long u nongwad RTI, haba pyntip sha ki lad pathai khubor ïa ka jubab RTI ba la ïoh pdiang na ka tnat Transports.
U Bah Rani u la ong, “katkum ka Advertisement ba la pynmih ha kawei na ki lad pathai khubor la pynkha thymmai ïa ka post Assistant General Manager ïa kaba ladep pynduh naduh ki snem 2016 eiei. Kane ka don eiei sha lyndet namarba mynshwa ha ki snem baladep na ka kyrdan jong u Depot Manager la lah ban pynkiew sha ka kyrdan Deputy General Manager (DGM) hynrei ka jingpynmih Advertisement na ka bynta ki ar tylli ki post, kata, ïa ka post Assistant General Manager bad Assistant General Manager (Administative) ka la wanrah jingeh ïa ki nongtrei Regular kiba la dei ban kiew kyrdan.”
“Ka jingwanrah ïa kine ki ar tylli ki post imat ka don eiei ha lyndet tang na ka daw ba ki nongtrei Contractual Basis kiba dang ar snem kin dei ki Stampman jongno re jongno,” la kynnoh u Bah Rani.
U la ïathuh ba katkum ka jubab RTI, na ki 107 tylli ki bos ki don mynta sa tang 40 tylli, ka jingdie lilam ïa ki bos naduh snem 2019 ka long haduh 9 tylli ki kali bad ka jingmih kaba die ïa kine ki bos lilam ka long T. 9 lak.
“Kine ki dei kiba wanrah ïa ka jingduhnong ïa ka ophis MTC,” ula ong.
Shuh shuh u la ïathuh ba katkum ka jubab RTI, ka pynpaw ba ka jingmih pisa na ki School Bos ba la pynïaid da ka MTC tang na ka bynta shi bnai ka long T.5,17,750 lak.
Ka jingpynlut pisa na ka bynta ban siew sha ki nongtrei ba la shongthait ka long T.6,8, 75, 549 klur.
Ha kaba ïadei bad ka jubab RTI ba la ïoh pdiang na ka tnat Jngohkai Pyrthei ka Sorkar Jylla halor ka jingpynlong ïa ka Cherry Blossom Festival, u Bah Disparsing Rani u la pyntip ba ka tnat ka la ai jubab ba kam don jingïohnong eiei ha kaba pynlong ïa kane ka Festival namarba ka Sorkar ka shu ai jingïarap T. 1. 99 klur sha ki nongpynïaid jong ka Cherry Blossom Festival kaba la long dang shen ha madan Kurkalang ha Ribhoi District.
