Nongstoin, Nohprah, 22: U Bah Ronalstone Syiem uba dei u Corespondent jong ka Kotkhubor The Shillongtimes na West Khasi Hills District u la khladnoh na kane ka sla pyrthei ha ka step Sngi Thohdieng ha Woodland Hospital, Shillong hadien ba ka jingshitom ka la ban ïa u mynta la katto katne bnai.
U Bah Ronal u dei u khun jong ka Kong Rakhelda Syiem bad u Bah Kresmohon Diengdoh na ka shnong Mawkhlam-Nongpyndeng .
La kha ïa u Bah Ronal ha ka 6 tarik, Nailar, 1986 bad u shong u sah ha ka shnong Upper New- Nongstoiñ bad la ka kurim ka Kong Ba-ailang Lyngdoh Nonglait lem bad u khun shynrang ba marwei.
U dei uwei napdeng ki nongthoh khubor uba la paw bad ih bha ha kane ka kam bad u la don bynta shibun ban noh synniang ha ka imlang sahlang lyngba ka kam pathai khubor kaba u la shakri mynta la palat 14 snem.
Na ka liang ka Journalist Association of West Khasi Hills (JAWKH) ka la pynpaw ïa ka jingsngewsih kthang halor ka jingkhlad kyndit jong une u dkhot bad u para nongthoh khubor napoh ka District kaba la long shisha ka jingduhnong kaba khraw ïa ka kynhun ki nongpathai khubor jong ka District bad ka Jylla hi baroh kawei.
Ka Association ka phah ïa u kyrwoh sngewlem sha ki bahaiing hasem, sha ka kurim bad sha u khun ba ai ba u Blei un pyntngen ïa ki khamtam ha kum kane ka por ba u lyoh badum u la wan kah ïa ka ïing sem ka jong ki.
Ki bahaing hasem ki la pyntip ba ka jingleit ontep donburom ïa ka met ba dang sah jong u Bah Ronal kan long ha ka 24tarik mynta u bnai ha u lum jingtep ka Balang Presbyterian Nongpyndeng ha ka por 2.30 baje nohphai sngi.
Ka Shillong Press Club bad ka kynhun ki nongthoh khubor na Ribhoi District ki pynpaw ïa ka jingsngewsih kaba kthang tang shu ïoh jingtip halor ka jingkhladnoh jong u Bah Ronaldstone Syiem.
Ha u kyrwoh sngewlem ba la phah sha ka kurim jong u Bah Ronald, ka Kong Baailang Lyngdoh Nonglait, ka Shillong Press Club bad ki nongthoh khubor ka Ribhoi District ki la ñiew tang ruh ïa u synniang u bynhei ba u Bah Ronald u la noh sha u sup u thiar jong ki lad pathai jingtip naduh ba u la sdang ban trei kum u nongthoh khubor jong ka Kotkhubor Kynjatshai bad ha All India Radio la palat 15 snem.
