Shillong, Nohprah, 22: Ki nongïalam jong ka Hynñiewtrep National Youth Movement (HNYM) ryngkat ka jingsynran lang jong u Acting Rangbah Shnong ka shnong Umtring u Bah Stemar Nongbri ha ka sngi Thohdieng ki la kynnoh ba u Rangbah Shnong ba la pynkheiñ da ka Dorbar Shnong u Bah Teiborlang Thangkhiew u la phah mih noh napoh shnong ïa ki 32 tylli ki longïing jong ka shnong Umtring, ka shnong kaba don hajan ka shnong Umbir, Ribhoi District da kaba aipor haduh ka 30 tarik u Nohprah, 2023 hynrei lym kumta un kyndang da ka puhshilum ïa kine ki longing kiba sah ha kane ka shnong.
U General Secretary ka HNYM u Bah Jophas Kurbah bad u Acting Rangbah Shnong ka shnong Umtring u Bah Stemar Nongbri ha ka jingïakren bad ki lad pathai khubor ki la kynnoh ruh ba u Bah Teiborlang Thangkiew u la kam nongkynti ïa ka shnong Umtring baroh kawei bad ha kajuh ka por ki la kynnoh ruh ba u la pyndonkam bakla ïa ki skhim kiba ka sorkar ka la ai sha ki paidbah kiba shong basah ha kane ka shnong.
Kane ka shnong ka dei kaba dang hap hapoh ka Raid Mawbuh jong ka Hima Mylliem, la ïathuh u Bah Jophas.
U la ïathuh ba ha u snem 1980 hadien ba la ithuh kum ka shnong bapura ïa ka shnong Umtring, khyndai ngut ki Rangbah Shnong kim ju pyndik satia bad ki la kynnoh ruh dei tad ynda la jied Rangbah Shnong ïa u Bah Teiborlang Thangkhiew ba ki la sdang ban mih ki kynrum kynram wat ban kam ruh ba ka Sanad kaba la ai da u Syiem ka Hima Mylliem ka dei ka Sanad shimet.
Katkum ka jingïathuh jong u Bah Jophas, la jied Rangbah Shnong ïa u Bah Teiborlang Thangkiew ha u snem 2014 bad u dei ruh u Rangbah Shnong uba shiphew jong ka shnong.
“Ngi la jied Rangbah Shnong ïa u (Bah Teiborlang Thangkhiew) namarba u dei u nonghikai jong ka skul shnong bad uba la nang la stad namarba ki nongshong shnong ki dei kiba duna ka pule ka puthi,” u la ong.
“Bun bun snem um shym la khot ïa ka Dorbar. U la sdang ban mushlia ïa ki kam shnong kam thaw, ïa ki skhim sorkar bad ïa ka hok jong ki nongshong shnong,” la kynnoh u Bah Jophas bad bynrap, “ngi la jied thymmai ïa u Bah Stemar Nongbri kum u Rangbah Shnong ba thymmai bad ngi la phah ruh ïa ka jingthoh sha ka Ophis jong u Syiem ka Hima Mylliem, hynrei mynta la shi snem kam shym la ai jubab eiei ruh em.”
“Ynda ngi la pynkheiñ ïa u kum u Rangbah Shnong u beh pynban ïa ki nongshong shnong bad kane paw shai ba u kam nongkynti lut ïa ka ing ka sem, ïa ka kam shnong kam thaw bad ïa ka jaka ka puta,” la kynnoh u Bah Jophas.
U la buh ruh ka jingkylli ïa ka Sorkar lada u Bah Teiborlang Thangkhiew u kam ba ka shnong Umtring ka dei ka jaka shimet kum ka Sorkar ka theh ïa ki skhim pynroi naduh ka MGNREGS, SSA, Swachh Bharat, PMAY, JJM bad kiwei kiwei ki skhim.
U la ïathuh ba ki don ki longing kiba dei ban ïoh ïa ka skhim shna ing baduk na ka PMAY ba la bhah lang na ka skhim MGNERGS, hynrei ka pisa kam shym la poi satia sha ki longing kiba dei ban ïoh jingmyntoi.
U President ka HNYM, Bah Louis Dohtdong u la ïathuh ba ka seng ka la lap ba u Bah Teiborlang u la buh da ka Signboard kaba don ïa ka jingthoh, “Private Land” ha ka shnong Umtring.
“Lada kane (shnong Umtring) ka dei ka “Private Land’ kumno u nud ban shna skhim bad kumno ka sorkar ka lah ban ai skhim sha ka jaka jong ki riew shimet. Ha ka kyrteng jong ki skhim MGNREGS, SSA, Swachh Bharat, PMAY, JJM bad kiwei kiwei ki skhim u pyndonkam da ka kyrteng jong ka shnong, katba ha ki jingthoh jingtar u kam ba ka dei ka jaka shimet,” la kynthoh u Bah Louis.
Shuh shuh u la ong ba ka HNYM kan ïakhun ïa kane ka ishu bad ka shnong Umtring baroh kawei.
U la ong ba ka Seng bad ka shnong Umtring kan sa pan jingpynshai na ka ophis Deputy Commissioner bad na ki bor Sorkar halor kane bad ong ruh ba ka Seng kan ym ailad ïa u Bah Teiborlang ban leh donbor ïa ki nongshong shnong shnong kumba u la byrngem ban kyndang ïa ki napoh ka shnong Umtring.
