Shillong, Nohprah 22: Hadien ba ka Sorkar MDA -2 ka la rai ban khang noh ïa ka Mawmluh Cherra Cements Limited kadei ka karkhana pynmih dewbilat ba nyngkong eh ha ka jylla, ki nongïalam Shnong na ka Shnong Mawmluh, ka Shnong ba ju tih mawshun kane ka karkhana ki ka pynpaw ba ki la ïohi lypa ba kan jia kumne, tangba ki la ong pat ba dei ban thung da ka jingtohkit ban lap ïa ki daw bad mano ba donkti kat haduh ban da khang khyrdep noh syndon ïa ka .
“Na ka liang jong ngi, ngim phylla shuh ban poi sha kaba khang, namar ngi don ha syndah bad ngi ïohi bha ïa kaei kaba jia”, la ong u Bah Banlam Kupar Lyngdoh, Secretary ka Shnong Mawmluh.
U la ong ruh ba kam dei ruh ban kynnoh tang ïa ka sorkar, hynrei dei ban kynnoh ruh ïa ki Liang Pyrshah namar ba kim shym la leh ïa la ka Jong ka bynta kum ki nongthaw aiñ, wat lada na ka liang ka Shnong ka la leit ïakynduh ïa ki ban kren lem ïa ki jingeh jong ka MCCL.
U la ïathuh ruh ba la ïakynduh bunsien ïa u Myntri Rangbah u Conrad Sangma halor ka jingnang troiñ kane ka Karkhana, hynrei um shym la treh ban thung jingtohkit bad pynpaw ba ka sorkar ka la pyllut bun ka pisa, hynrei ym shym la lah kat ban pynkhie im ïa kane ka Karkhana kaba la seng naduh u snem 1966 naduh ka por jong ka sorkar Assam.
U Bah JS Rajee, Matabor ka Shnong uba long ruh u nongtrei barim ka MCCL bad shakri da ki phew snem hangne, u la ong ba wat lada la rai ban khang noh ïa kane ka karkhana, hynrei dei ban wad ïa ki daw lane ban post mortem ban lap ïa ka daw kumba post mortem ïa u briew ba ïap ban lap ïa ka daw balei u ïap.
U Bah Rajee u ka kynnoh ba ka daw ba kongsan ba khyllem ka MCCL kadei hi na ka jingbamsap bad dei namar kane ka daw dei ban tohkit mano ba donkti ha kane ka jingbamsap..
U Bah Pynskhembor Kharwanlang, Sirdar jong ka Shnong u la ong ba ka jingkhang noh ka sorkar ïa kane ka karkhana kan ktah shibun ïa ka Shnong Mawmluh bad ïa ka thaiñ Sohra hi baroh kawei..
