Shillong, Nohprah 22 : U Executive Member ka tnad Development, Bah Carnes Sohshang u la ong ba ka don ka jingnoh shilliang ha ka rukom sam skim sha ki MDC na ka bynta ban ai jingïarap ïa ki skul ha ka por jong ka Executive Committee barim.
“Dei na kane ka daw ba kane ka Executive Committee ka la rai ba yn ai jingïarap tang kawei ka skul na ka bynta uwei u MDC ne kawei kawei ka constituency,” u la ong haba jubab halor ka jingkylli ba wanrah da u Nongïalam ka Liang Pyrshah, Bah Titos W Chyne ha ka sngi kut jong ka Dorbar Tlang kaba long ha kane ka sngi Palei.
Haba jubab pat katno ka mang tyngka na ka bynta ka jingïarap sha ki skul, u Executive Member u la ïathuh ruh ba la mang 25 lak tyngka bad la kumno kumno kan poi 36,000 tyngka kawei ka skul.
Shwa kane, u EM u la ong ruh ba kane ka EC ba mynta kam kwah ba ka rukom ai jingïarap ïa ki skul kan noh shilliang kumba ka long ha ki por ba la dep ha kaba ki don ki constituency kiba ïoh bun bha katba kiwei pat kiba don lang ha ka Liang Synshar ki ïoh tang mar iwei ne ar tylli ki skul.
“Ha u snem 2021 don ki constituency ba ïoh 4 tylli, don pat kiba ïoh tang iwei, ne ar. Kum ha Mawkynrew ïoh saw tylli katba ha kiwei ki constituency kum ha Mylliem, Mawkhar, Sohryngkham bad kiwei ïoh tang mar iwei,” u la ong
Shuh shuh u la ïathuh ruh ba ha u snem 2021 – 22 ka Mawkynrew ka ïoh 7 tylli ki skul katba ka Jaïaw, Sohryngkham bad kiwei ïoh mar kawei.
“Dei na kane ka daw ngi kwah ban pynbeit khnang ba kan ym don shuh ka jingnoh shilliang. Kumta ngi la rai ban ai shwa mar kawei kawei,” u la ong.
Shuh shuh haba jubab halor ka jingkylli na u Bah Titos la ka EC ka lah neem ban pynneh beit ban ïarap mar ar tylli ki skul ban ïoh jingïarap ha kawei kawei ka constitutuency, u Bah Carnes u la ong ba ïa kane kin sa rai lang ha ka Executive Committee.
Na ka liang u MDC ka Mawkynrew haba shim bynta lang, u la ong ba kam don satia ka jingnoh shilliang ban sam ïa ki skim ha ka por ba la dep hynrei u la ïai ban pat ban kyntu ïa ka EC ban pynneh beit ïa ki jingïarap mar ar tylli ki skul.
“Ka Executive Committee ka la dep ban rai ban ai shwa mar kawei, hynrei kumba ong u MDC Mawkynrew, lehse lada ym don ba phah ne pan ngi lah ban ai wat sa mar lai tylli ruh,” bynrap biang u Executive Member, Bah Carnes Sohshang.
